Presidenti i Kosovës, Hashim Thaçi, ka thënë se korrigjimi i kufijve me Serbinë është mundësia e vetme që Presheva, Bujanoci dhe Medvegja t’i bashkohen Kosovës.
Thaçi tha se ai ka hedhur poshtë opsionin e ndarjes dhe të shkëmbimit, por termin për korrigjim të kufijve e ka përdorur vetëm në favor të Kosovës.
Për këtë ka thënë se kundërshtuesit e këtij propozimi po propagandojnë për ndarje të Kosovës dhe ka shtuar se është e domosdoshme që qytetarët të vendosin vetë për këtë çështje, përmes referendumit.
Reagimi i tij vjen pak minuta pasi kryeminsitri i Kosovës Ramush Haradinaj deklaroi se “kufijtë lëvizin vetëm me luftë”.
Ky është postimi i Thaçit në Facebook:
Një mesazh për ata që mendojnë se korrigjimi i kufijve në mënyrë paqësore është ide e keqe, përkundër faktit se e dinë që është mundësia e vetme që Presheva, Bujanoci dhe Medvegja t’i bashkohen Kosovës.
Që të jem i qartë: Unë e kam hedhur poshtë me kohë opsionin e ndarjes dhe të shkëmbimit të territoreve. Unë jam duke folur vetëm për korrigjim të kufirit në mënyrë paqësore, dhe atë, në favor të Kosovës. Ndërsa, kundërshtuesit e këtij propozimi, propagandojnë për ndarje dhe shkëmbim të territoreve.
Në një situatë të tillë, vertet që nuk mbetet rrugë tjetër përveç fuqizimit të vendimmarrjës së qytetarëve të Republikës së Kosovës, duke iu mundësuar atyre për të vendosur vetë se kush ka të drejtë dhe se cili opsion është në interes të Kosovës. Prandaj, është e domosdoshme që t’iu mundësojmë qytetarëve tanë të drejtën e referendumit, gjë që për të cilën jam duke punuar që të bëhet realitet.
