Komisioni i Pavarur i Kualifikimi sqaroi në fillim të seancës së njoftimit të vendimit për kreun e Prokurorisë së Krimeve të Rënda se kishte shtyrë dhënien e vendimit me 8 ditë për shkak të akuzave publike ndaj Prelës. Drejtuesi i seancës tha se akuzat ishin marrë në konsideratë dhe ishin shqyrtuar prej Komisionit, por në to “nuk ishin gjetur indicie dhe dyshime të arsyeshme për të rihapur hetimin”.
KPK më pas njoftoi se Donika Prela konfirmohej në detyrë. Prela u largua nga salla menjëherë pas njoftimit pa bërë asnjë koment.
Shtyrja
Konfirmimi i Prelës kaloi përmes një sërë akuzash publike, ndërsa KPK dhe vëzhguesi ndërkombëtar ngritën një sërë puikëpyetjesh kryesisht rreth të ardhurave të bashkëshortit që rezultoi se kishte punuar pjesërisht në të zezë.
Po ashtu Prela është akuzuar disa herë publikisht nga Partia Demokratike si e njëanshme, ndërkohë një ditë para seancës së planifikuar të njoftimit të vendimit deputeti Enkelejd Alibeaj aludoi për lidhje të prokurores me krimin.
“Organet e vetingut duhet t’i japin përgjigje pyetjes: a është Donika Prela pjesë e dosjes 339, e kapur në përgjim me bandën e Avdyljave duke biseduar me kreun e bandës Astrit Avdylaj? Përgjimet e dosjes 339 janë bërë në kohën kur Donika Prela drejtonte Prokurorinë e Durrësit dhe Astrit Avdylaj u arrestua për armëmbajtje pa leje, por më pas u lirua si i pafajshëm”, tha Alibeaj. Ai po ashtu aludoi për një takim mes Komisioneres Valbona Sanxhaktari dhe prokurores.
Këto akuza detyruan KPK të shtynte ditën e dhënies së njoftimit. Roland Ilia, kryesuesi i trupës që gjykoi rastin lexoi në seancë se akuzat publike ishin verifikuar nga Komisioni. Ai tha se kjo ishte arsyeja pse ishte marrë kohë shtesë. Ai megjithatë vuri në dukje se nga verifikimet nuk kishin rezultuar të kishte prova apo dyshime të arsyeshme për të hapur hetimet nga e para. Pas kësaj ai tha se KPK vendosi ta cilësonte të mbyllur procesin me atë që kishte rezultuar nga hetimi i mëparshëm.
Ilia njoftoi se ishte vendosur konfirmimi i Prelës në detyrë, pasi ishin shqyrtuar provat kundër saj dhe përgjigjet e saj rreth gjetjeve të Komisionit.
Problemet në seancë dëgjimore
Drejtuesja e komanduar e Krimeve të Rënda, Donika Prela u përball me pikëpyetje mbi të ardhurat e bashkëshortit dhe transaksionet me pasuritë e paluajtshme në seancën dëgjimore me Komisionin e Pavarur të Kualifikimit më 22 janar. Prela u mbrojt me dokumente shtesë si dhe me argumentin se detyrimet tatimore të bashkëshortit ishin përgjegjësi e punëdhënësit.
Drejtuesja e Prokurorisë së Krimeve të Rënda u ngarkua me barrën e provës për burimet financiare të një të afërmi të bashkëshortit, i cili u kishte dhënë 15 mijë euro hua për blerjen e një apartamenti në vitin 2007 si dhe dha sqarime mbi denoncimin e një qytetari lidhur me apartamentin ku banon aktualisht, i blerë për 110 mijë euro në vitin 2018.
Procesi i vetingut për të u krye nga trupa gjykuese e drejtuar nga Roland Ilia, me relatore Valbona Sanxhaktarin dhe anëtar Olsi Komicin. Gjatë seancës dëgjimore, Prela u përball me komente të hidhura nga vëzhguesi i Operacionit Ndërkombëtar të Monitorimit, Theo Jacobs, i cili e krahasoi dosjen e saj të vetingut me shijen e keqe të një ilaçi të kapërdirë pa ujë në mëngjes, por që kalon në kohën e drekës.
“Taksat nuk janë paguar. Në versionin tuaj ju e paraqitët bashkëshortin në rolin e viktimës, por më duket se në këtë rast ka pasur një marrëveshje,” tha Jacobs, duke iu referuar asaj që në Shqipëri njihet si pagesa me “dy bordero”.
Prokurorja Prela u përgjigj se ajo dhe bashkëshorti i saj kishin jetuar në Shqipëri dhe jo në ndonjë vend të BE-së, ku marrëdhëniet e punës fillojnë dhe mbarojnë në mënyrë të ligjshme. “Bashkëshorti im ka nënshkruar një kontratë dhe i është përmbajtur detyrimeve të saj. Legjislacioni shqiptar ngarkon me përgjegjësi punëdhënësin për detyrimet dhe nuk ka asnjë dispozitë që tregon se tatimi në burim mund të paguhet në mënyrë vullnetare,” tha Prela gjatë seancës dëgjimore.
