Futja e deputetëve të rinj në Parlament duket se ka alarmuar PD dhe LSI. Falë dhe ndërkombëtarëve po tentohet që të krijohet një opozitë e re brenda Kuvendit dhe kjo mund të sjellë fundin politik të Bashës, Kryemadhit dhe të shumë emrave të tjerë. Si duket, kreu demokrat nuk i mendoi këto pasoja kur deklaroi djegien e mandateve dhe tani e ka kuptuar se ishte një veprim i nxituar.
Burime shumë të sigurta në PD dhe në KQZ, i thanë gazetës se po luhet një lojë mjaft e madhe në prapavijë. Përmes KQZ, PD po tenton që të zvarrisë procedurat e futjes së deputetëve të rinj në Parlament. Gazeta ka mësuar se shumë emra që duan të marrin mandate nuk janë njoftuar nga Komisioni i Zgjedhjeve ende dhe shumë prej tyre kanë bërë ankesa si në KQZ, ashtu dhe pranë ambasadave.
Sipas burimeve, KQZ po i përcjell emrat në fjalë duke ju thënë se nuk po gjen dot adresat e kandidatëve në radhë që ju takon mandati, por sinjalet janë se po krijohet një vonesë artificiale për të shpëtuar PD e LSI nga shkrirja. Janë 49 persona në listë që kanë pranuar të futen në Parlament dhe të marrin 35 vendet e lëna bosh, por nuk po u jepet kjo mundësi. Fillimisht KQZ po kryente në kohë rekord të gjitha verifikimet dhe po ashtu lajmëronte në kohë kandidatët.
Pro tani procedurat po stërgjaten edhe pse shumë nga kandidatët që ftohen nga KQZ për të marrë mandatet kanë dorëzuar dorëheqjet. Po ashtu, shumë të tjerë kanë dalë publikisht dhe kanë njoftuar se nuk do futen në Parlament. Sinjalet janë se po gatuhet një lojë për të vonuar futjen e emrave të rinj, me shpresën se do gjendet një zgjidhje afatmesme për situatën.
Një tjetër detaj është se KQZ ka rralluar ndjeshëm dhe mbledhjet, krahasuar me periudhën sapo u dogjën mandatet. Dje pati një mbledhje dhe nuk u diskutua aspak si për dhënie mandatesh, ashtu dhe për mospranimin e tyre. Ata që kanë refuzuar mandatet kanë dorëzuar dorëheqjet dhe KQZ shumë lehtë mund të marrë vendime për ta. Por jo, mbledhjet janë rralluar dhe procedurat po stërgjaten.
Loja me adresat
Komisioni Qendror i Zgjedhjeve ka futur një tjetër praktikë, e cila krijon vonesa në kalimin mandateve te emrat pasardhës. KQZ ka vendosur të bëjë njoftim publik për një pjesë të kandidatëve, me argumentin se nuk u gjen dot adresat për t’i njoftuar se duhet të marrin mandatin. Një rast absurd është ai i Dorian Telitit. KQZ thotë se i ka dërguar atij shkresë që në datën 21 mars për ta njoftuar, por duke qenë se nuk e gjetën dot adresën, vetëm dje ka bërë një shpallje publike dhe do pritet 10 ditë të tjera për përgjigjen e tij.
Por të gjithë e dimë se postës nuk i duhen 10 ditë për të njoftuar se nuk gjendet adresa. Pra kemi një vonesë për më shumë se 20 ditë. E njëjta gjë vijon dhe me kandidatë të tjerë si: Fatjona Dhimitri, Isuf Meta, Prele Gjoni, Petrit Vargu, Enri Ceno, Fitimtar Zekthi, Agron Qoku, Ana Kadillari, Besmira Petriti, Enkelejda Sallaku, Gjok Uldedaj, Henelida Sava, Klevi Pojana, Llambriola Misto, Marta Male, Martin Biba, Zana Prela.
Por skandali thellohet akoma dhe më tej, pasi në listën në fjalë ka emra që kanë dorëzuar dorëheqjen në KQZ dhe nuk e pranojnë mandatin. Por sërish institucioni tenton t’i njoftojë dhe të presë afatet. Por përmes shpalljeve publike dhe lojës me adresat po krijohet një tjetër vonesë artificiale. /Kliti Topalli
