sh-kreu i Aleancës Kuq e Zi, Kreshnik Spahiu ka vijuar me kritikat lidhur me vizitën e kryeministrit grek në Himarë. Dy ditë më parë, ai e theksoi se ishte gafë e madhe të quash Himarën zonë minoritare, ndërsa dje përmes një postimi në rrjetet sociale, Spahiu shprehet se ata janë emigrantë të ardhur në atë zonë.
Por sipas tij, Berisha është ai, i cili pronat në atë zonë nuk ja u dha pronarëve, por ja u dha grekëve. “Grekët s’janë minoritet në Shqipëri por thjesht diasporë. Ata nuk jetojnë në toka etnike greke por erdhën emigrantë në pronat e gjyshërve tanë dhe punuan si hyzmeqarë. Më pas pronat tona, Berisha s’na i ktheu ne pronarëve por ja u ndau hyzmeqarëve që emigruan nga Greqia në jugun e Shqipërisë”, shkruan Spahiu.
Por me këtë deklaratë Spahiu rrëzon Sali Berishën. Dje ky i fundit reagoi për vizitën e Mitsotakis dhe deklaroi po ashtu se në Himarë nuk ka minoritet, por gazetarët e nxorën blof. Ata i kujtuan se ai në Himarë nuk zhvilloi primare dhe ja la bashkinë partisë së minoriteti grek PBDNJ.
Mirëpo edhe Spahiu i ka kujtuar Berishës se si ju dha pushtet dhe të drejta minoritarëve, ndryshe nga sa shprehet tani. “Himara ka një realitet të pamohueshëm, që disa fshatra janë dygjuhëshe, qyteti ç’është e vjetër, porti i vjetër është i miksuar, por këto si gjuha, nuk e bëjnë vërtet Himarën gjë tjetër vetëm bastion i shqiptarisë. Himara së bashku me Malësitë e Alpeve kanë pasur kodet, kanunet e tyre.
Ajo ç’ka mund të them unë është kjo. Kryeministri i Greqisë mund të vizitojë çdo zonë, por Himara me të gjithë historinë dhe dokumentet e saj është shqiptare”, tha Berisha.
Flirtet e Berishës me grekët
Ndërkohë Kreshnik Spahiu shprehet se Berisha ishte ai që ju bëri qokën grekëve. Sipas tij, ai ju dha aq shumë të drejta, sa edhe në Greqi nuk do i kishin.“Gëzojnë më shumë të drejta, se me ardhjen e Berishës në 2005 ju garantua një paketë të drejtash, duke nisur nga censusi dhe besimi fetare, gjë që nuk ndodh në Greqi.
U garantoi 6 varreza kolektive të ushtarëve grekë që nuk janë as për shqiptarët në Çamëri. U siguroi marrëveshjen për demarkacionin e ujërave dhe një autonomi të gjerë me baza etnike të komunave që janë që hap mundësinë për një asosacion të komunave greke”, tha ai. Nga ana tjetër, ish- kreu i Aleancës Kuq e Zi Spahiu u shpreh pak ditë më parë se SHBA do të shpall të tjera persona non grata. Ai u shpreh se deklarata e ambasadores Yuri Kim për non grata të tjerë nuk i referohet opozitës, Partia Demokratike apo Partia e Lirisë që për Shtetet e Bashkuara të Amerikës janë e shkuara, por Partia Socialsite dhe qeverisë aktuale.“Juri Kim e përcaktoi në të ardhmen, nuk ju referua politikanëve të shkuar, që është PD dhe PL.
Kur i referohet të tashme e ka me Partinë Socialiste. Në rastin e non grateve ju referua qeverisë aktuale, kjo lidhet drejtpërdrejtë me Partia Socialiste se ishte konflikti me Ministrinë e Jashtme, e tha një ditë pasi e shantazhuan. Diku nga janari pritet që zyrtarë të lartë të PS të jenë në listën e personave non grata”, tha Spahiu. Sipas tij, karshillëku që Rama po i bën SHBA-ve lidhet me sigurinë që ka ai përballë Berishës si lideri i opozitës, të cilin SHBA nuk e do në pushtet.
“Arsyeja pse socialistët janë arrogantë është se mendojnë se po luajnë shah mat me Shtetet e Bashkuara të Amerikës. Duke qenë se SHBA nuk do që të vijë Berisha në pushtet, Rama mendon se sa të ketë Berishën përballë nuk e largojnë dot nga pushteti. Meta, Rama, Berisha kanë krijuar një rreth vicioz, nuk lejojnë asnjë lëvizje të re politike”, nënvizoi Spahiu.
