Një zjarr masiv ka përfshirë zonën lindore të ishullit të Kretës në Greqi në një terren të thyer pyjor që prej pasdites së djeshme.
Flakët janë përhapur me shpejtësi drejt jugut favorizuar nga erërat e forta që arrijnë deri në 8 ballë në shkallën Beaufort duke kërcënuar kështu shtëpi e hotele të zonës turistike.
Fronti i zjarrit tani shtrihet në të paktën 6 km, sipas shërbimeve të emergjencës, duke e bërë gjithnjë e më të vështirë kontrollin. Tymi shtrihej deri në plazhin Makry Gialos, 10 km nga Achlia në Lasithi, ku zjarrfikësit po luftonin me flakët.
Siç raportohet nga mediat vendase, disa shtëpi tashmë janë shkrumbuar ndërsa janë shkaktuar dëme të shumta në të mjella dhe sera. Sakaq, autoritetet kanë urdhëruar evakuimin e banorëve të zonës ndërsa në terren janë angazhuar 155 zjarrfikës, 8 grupe shëtitësish dhe 38 automjete.
Më herët, u lëshua urdhri “112” për evakuimin e banorëve në 5 vendbanime, konkretisht në Agia Fotia, Achlia, Galini, Ferma dhe Koutsounari. Nga shtëpitë e tyre janë larguar rreth 1.500 banorë duke u zhvendosur në lerapetra. Rreth 200 prej tyre po strehohen përkohësisht në arenën sportive të mbyllur të qytetit.
