Prokuroria ka tronditur fort dje Partinë Demokratike dhe kreun e saj Lulzim Basha. Lobimet në SHBA gjatë vitit 2017 dhe lidhjet me rusët duket se kanë fundosur liderin e opozitës, pasi telashet e tij me drejtësinë janë shtuar. Dje që herët në mëngjes Lulzim Basha u paraqit në Prokurorinë e Tiranës, ku për 90 minuta dha sqarime për të gjitha kontrata e tij të lobimit në SHBA.
Të enjten ai refuzoi të paraqitej, por prokuroria i kishte dërguar një tjetër letër, duke i kërkuar të paraqitej me urgjencë të hënën në orën 09.00, pasi është person që ka dijeni për lobimet dhe duhet që të japë sqarime. Këtë herë Basha nuk e shmangu dot organin e akuzës dhe u prit fiks në orar, duke dhënë sqarime për të gjitha kontaktet me “Biniatta Trade”, Nicolas Muzin, apo dhe shtetas të ndryshëm rusë.
Pas dëshmisë, Basha nisi sulmet ndaj organit të prokurorisë dhe kërkoi që të bëjë publike letër-porositë që ka marrë nga SHBA e Skocia. “Ka një vit e gjysmë që ka nisur ky hetim, ka më shumë se gjashtë muaj që kanë ardhur përgjigjet nga SHBA dhe Britania e Madhe, nga Skocia, të cilat vërtetojnë se as Partia Demokratike, as një drejtues i PD nuk ka shkelur asnjë ligj, as në Shqipëri, as në SHBA dhe as në Britaninë e Madhe. Ndaj i kam kërkuar prokurorisë dhe ju nxis ju t’i kërkoni t’i bëjë publike përgjigjet e ardhura nga SHBA dhe Britania e Madhe”, tha Basha.
Reagon prokuroria
Fill pas deklaratës së kreut të PD, erdhi një reagim nga Prokuroria e Tiranës, e cila përmes një deklarate për mediat ka hedhur dritë mbi hetimet që po bëhen për lobimet e PD në SHBA. Por përmes kësaj deklarate prokuroria ka futur të dridhurat në kampin demokrat, pasi ka njoftuar se ka prova të mjaftueshme se PD nuk ka deklaruar plot 650 mijë dollarë të përdorura për lobime.
Sipas ligjit, çdo parti duhet të deklarojë shpenzimet për zgjedhje, përfshirë dhe lobimet. Por prokuroria ka zbuluar se PD në KQZ ka deklaruar vetëm 25 mijë dollarë, ndërsa ka fshehur 650 mijë të tjerë të përdorura për lobime. “Nga hetimi kanë rezultuar dyshime të arsyeshme të bazuara në prova se ka një diferencë thelbësore mes deklarimeve të bëra zyrtare për shpenzimet e bëra nga subjekti PD, dhe shpenzimeve reale që ky subjekt ka bërë.
Ky subjekt ka deklaruar vetëm shumën prej 25.000 dollarësh, dhe nuk ka bërë deklarime për shumën prej 650.000 dollarësh. Sipas akteve të ardhura nga letër-porositë, e mbërritura nga SHBA-ja dhe Skocia rezultojnë në mënyrë të qartë pagesat e bëra dhe të padeklaruara, çfarë nënkupton se subjekti PD nuk ka bërë asnjë deklarim për këto pagesa në kundërshtim me ligjin”, thuhet aty.
Parashikimet në Kodin Penal
Nga deklarata e prokurorisë kuptohet se dosja shumë shpejt mund të mbyllet dhe të shkojë në gjykatë, pasi janë siguruar prova të mjaftueshme që faktojnë mashtrimin e PD dhe liderit të saj Basha. Por me këtë lëvizje Lulzim Basha rrezikon të dënohet deri në 7 vite burg. Ai akuzohet për veprën penale të “Falsifikimit të vulave, stampave ose i formularëve”, parashikuar nga neni 190 i Kodit Penal, i cili dënohet 6 muaj deri në 4 vite burgim. Po ashtu akuzohet për “Refuzim për deklarimin, mosdeklarim, fshehje ose deklarimi i rremë i pasurive…”, parashikuar nga nenin 157/a i Kodit Penal, vepër e cila dënohet me gjobë deri në 3 vite burg.
Pyeten Ristani, Bardhi e Dervishi
Ditën e djeshme në prokurori janë paraqitur dhe Sekretari i Përgjithshëm i PD, Gazmend Bardhi, financieri i partisë Ilir Dervishi dhe ish-deputeti Arben Ristani. Prokuroria në njoftimin e saj bën me dije se ka pasur 2 pagesa nga PD që nuk figurojnë të deklaruara. Ngjarjet vijnë në një kohë kur Basha nuk ka imunitet dhe rrezikon madje dhe arrestimin. Dorëzimi i mandateve i ka bërë ish-deputetët e PD-LSI pre të lehtë ndaj prokurorisë, pasi ata mund të përgjohen, kontrollohen dhe madje mund të arrestohen. /Kliti Topalli
