Kryeministri Edi Rama ka zhvilluar ditën e djeshme një bashkëbisedimin “live” me portalin studentor në Instagram, ndërsa u është përgjigjur disa pyetjeve lidhur me hapjen e universiteteve dhe akuzave të pandemisë nga opozita mbi menaxhimin e pandemisë.
Rama u shpreh se vendimi mbi hapjen e universiteteve do të vijë në bazë të ecurisë së virusit, ndërsa theksoi se nuk mund të bëjmë spekulime. “Të gjitha vendimet, jo këtu po kudo edhe pse kanë impakt të madh, në këto kushte merren pak ditë përpara. Nuk jemi në një situatë normale kur vendimet që ndryshojnë strategjinë e të jetuarit, të shkuarit në shkollë, duhet të lajmërohen shumë kohë më përpara.
Kjo është normalja në normalitetin e situatës. Faktikisht vendimi është marrë pak ditë para se të hynte në fuqi, për të kaluar online, por siç mund të themi këtë duhet të themi edhe tjetrën se është e kotë të bëjnë spekulime se deri kur do qëndrojë kështu situata”, tha Rama.
Në përgjigje të akuzave të opozitës se situata ka dalë jashtë kontrollit, Rama tha se Shqipëria ka qenë në lartësinë e duhur sa i përket menaxhimit të pandemisë. “Patjetër që nuk ka asgjë perfekte për sa kohë është punë e njeriut dhe me siguri çdo gjë pasi e ke kaluar dhe sheh me sytë e reflektimit mund të bëhet më mirë. Ka gjëra që mund të bëheshin më mirë, edhe në këtë drejtim, por përgjithësisht kemi qenë në lartësinë e duhur të kësaj sfide”, tha ai.
Sakaq, kryeministri Edi Rama theksoi se deri më tani nuk janë planifikuar masa shtrënguese për festat e fundvitit, por nuk përjashtohet si mundësi. “Besoj që do ta kalojmë dhe do ta kalojmë duke dalë jo të dërrmuar, por sigurisht më të çliruar dhe më të fortë. Masat shtrënguese nuk i vendos unë, i vendos komiteti teknik i ekspertëve. Masa më e rëndësishme është çfarë bëjmë si individë me rregullat e thjeshta sepse në fund të fundit ne jemi transmetuesit e këtij virusi dhe nëse e ndihmojmë apo e pengojmë virusin, varet nga ne.
Deri tani nëse shohim atë që është problemi themelor i kësaj sfide, aftësinë për të përballuar fluksin e njerëzve në nevojë në spital them se jemi në ekuilibër. Nëse shohim fatalitetet edhe pse një jetë e humbur është shumë, jemi në ekuilibër. Askush, askund nuk i di të gjitha, mësojmë hap pas hapi. Për momentin nuk kemi paraprirë masa shtrënguese, por nuk i përjashton masat shtrënguese”, tha Rama.
