Ministri i Jashtëm ukrainas Dmytro Kuleba i bëri thirrje Gjermanisë që të marrë drejtimin në procesin që çon në bërjen e Ukrainës pjesë e Bashkimit Evropian.
Në një video të postuar në Facebook të dielën, Kuleba tha se gjatë vizitës së tij në Berlin në fillim të javës, se ai kishte “një diskutim shumë racional me gjermanët rreth bërjes së Ukrainës pjesë e BE”.
“Unë u thashë atyre se do të ndodhë gjithsesi. Është e pashmangshme që Ukraina do të marrë një status kandidat herët a vonë. Elitat gjermane kanë një zgjedhje për të udhëhequr këtë proces dhe për të gdhendur emrat e tyre në historinë e Evropës ose do të ndodhë akoma, por pa udhëheqjen e tyre”, shtoi ai.
Ministri diskutoi gjithashtu edhe embargon ruse të naftës, të debatuar aktualisht nga vendet anëtare të BE-së, si dhe çështja e një embargoje ruse të gazit u ngrit gjithashtu gjatë vizitës së tij.
Pas takimit të tij me zyrtarët gjermanë, Kuleba u angazhua edhe në bisedime me ministrat e jashtëm të G7 dhe tha se ata “e mirëpritën idenë se është e nevojshme ngrirja e aseteve ruse dhe transferimi i tyre në Ukrainë për të ndihmuar në rindërtimin e vendit tonë.
Këtu bëhet fjalë për qindra miliarda euro. Gjithashtu, G7 tha se janë të gatshëm të marrin pjesë në rindërtimin e Ukrainës, në rindërtimin e qyteteve dhe infrastrukturës së saj. Ju e dini se Presidenti i Ukrainës ka një ide se vendet duhet të marrin në dorë disa rajone ose qytete që janë prekur nga lufta dhe partnerët tanë e mirëpresin këtë ide.”
Kuleba bëri thirrje gjithashtu për “një zgjidhje për të hequr bllokadën ruse për eksportin e produkteve agro-industriale ukrainase në botë. Tani për tani, agresioni rus po e çon botën drejt zisë së bukës. Kjo është arsyeja pse është e rëndësishme të punohet edhe me vendet afrikane. Ne duam që ata të ndihmojnë në zgjidhjen e kësaj çështjeje.”
