Denigrimi i luftës së Ushtrisë Çlirimtare të Kosovës, ndryshimi i fakteve rreth masakrave të kryera nga forcat serbe si dhe nxitja e një konflikti ndër etnik ishin disa nga misionet e dy të dyshuarve për spiunazh Bedri Shabani e Muharrem Qerimi që përshkruhen në aktakuzën e ngritur nga Prokuroria Speciale.
Në dosjen e akuzës të siguruar nga A2, Shabani dhe Qerimi akuzohen se kanë bashkëpunuar me Agjencinë e Inteligjencës dhe Sigurisë së Serbisë e njohur si BIA.
Në rastin e Shabanit, aktatkuza thotë se ka marr dhe dërguar informacione për Ushtrinë Çlirimtare të Kosovës, përfshirë eprorët e saj si dhe për ngjarje e objekte specifike sikurse Spitali Ushtarak i UÇK-së.
“I akuzuari Bedri Shabani dyshohet se përmes komunikimeve telefonike, postës elektronike por edhe takimeve fizike të zhvilluara në territorin e Serbisë i ka raportuar ose dhënë informacione zyrtarit të lartë të BIA-s serbe me inicialet S.R. por edhe kolonelit me inicialet B.J. që ka shërbyer si komandant i policisë serbe gjatë kohës së luftës në Kosovë dhe ka udhëhequr operacionin policor-ushtarak për një nga masakrat më të rënda që ka ndodhur 26 vite më parë”.
Shabani akuzohet se ka rrezikuar dhe dëmtuar rëndë rendin juridik kushtetues dhe sigurisë së Kosovës.
“I pandehuri ka ndihmuar BIA-n në krijimin e një narrative të pavërtetë me qëllim që të ndërlidhë Spitalin Ushtarak të UÇK-së [e redaktuar] me të ashtuquajturën [e redaktuar] në [e redaktuar] , kinse janë bërë trafikim organesh si dhe të vë në dyshim të vërtetën e masakrës së [e redaktuar] duke kërkuar nga zyrtari i BIA-s dhe B.J. që të ndërmarrin veprime operacionale që do të shkaktonin një konflikt të gjerë ndër etnik në territorin e Republikës së Kosovës”, Akuza e Prokurorisë ndaj Bedri Shabanit.
Nxitja e tensioneve ndër etnike dhe ndonjë akt i mundshëm shihen si shumë të dëmshme për shtetin e Kosovës.
“Gjatë këtyre akteve terroriste të paraqesë qytetarët e Republikës së Kosovës si jomiqësorë në raport me serbët lokalë dhe në anën tjetër ta paraqesë shtetin e Kosovës si të pafuqishëm dhe jofunksionalë dhe mozbatues të ligjit duke u përpjekur që nuk ka siguri brenda territorit të Kosovës”, thotë Avni Islami
ekspert i sigurisë.
Në anën tjetër, i dyshuari i dytë Muharrem Qerimi besohet se nuk ka bashkëpunuar me Shabanin pavarësisht se objektivat kanë qenë pothuajse të njëjtë.
“Nga vitit 2012 e deri në momentin e arrestimit të tij me 5 qershor të vitit 2024 i akuzuari Muharrem Qerimi dyshohet se ka ndihmuar BIA-n serbe në formën e mbledhjes dhe dërgimit të informacioneve, dokumenteve dhe materialeve të tjera rreth luftës dhe pjesëtarëve të UÇK-së për emrat e eprorëve të Policisë së Kosovës, të Inspektoratit Policor të Kosovës si dhe emrat e dëshmitarëve në një nga rastet më të rëndësishme gjyqësore të Kosovës”.
Edhe në akuzën ndaj Qerimit përmendet rreziku që i është shkaktuar Kosovës nga aktiviteti i tij në dhënien e informacioneve. Përpos spiunazhit, mbi Qerimin rëndon edhe akuza për mbajtje pa leje të armës e cila i është gjetur në shtëpinë e tij.
Ekspertët e sigurisë thonë se BIA serbe mund të ketë të tjerë të rekrutuar në Kosovë që mund të zbulohen në këtë rast.
“Gjatë incizimeve dhe bisedave që i kam dëgjuar është e pamundur që të veprojë një individ, pra unë besoj që gjatë marrjes në pyetje dhe tashmë kemi një aktakuzë ndaj këtyre dy personave, unë pres që nga këta dy persona do të kapen një rrjet i personave të dyshuar të cilët kanë bashkëpunuar me ta”, tha Avni Islami, ekspert i sigurisë.
Kapja e këtyre dy personave, që prokuroria pretendon se ka prova të mjaftueshme për t’i dënuar, u pa edhe si një tjetër fitore e Agjencisë Kosovare të Inteligjencës përballë BIA-s serbe e cila në vazhdimësi kërkon ngritjen e tensioneve në Kosovë.
