Është diskutuar shpesh për rolin që luajti mbreti Zog në historinë shqiptare. Ka shumë opinione në fakt lidhur me të. Disa e quajnë si një ndër epokat më shkëlqyese të historisë shqiptare dhe disa të tjerë e quajnë si një periudhë të errët të kombit tonë. Konica.al nuk ka si qëllim të mbajë qëndrime. Çdo periudhë e historisë shqiptare gjykohet nga vetë ajo. Por qëllimi është të pasqyrohet jeta shqiptare ajo që ka qenë pa llustrat e komunizmit dhe pa diktatin e tij. Historia duhet gjykuar me të mirat e të këqijat e saj. Dhe Zogu pati shumë kontribute në historinë shqiptare siç pati dhe anë të errëta…
Po le të mbetemi tek priceshat shqiptare.
Motrat e Zogut do të merrnin nga një pozicion të caktuar në jetën publike shqiptare. Secila prej princeshave mori drejtimin e një sektori të caktuar të jetës publike. Princesha Senije u vu në krye të Kryqit të Kuq Shqiptar. Në fakt Princesha Senije është përshkruar nga autorë të ndryshëm si motra më e preferuar nga mbreti Zog. Pas vdekjes së nënës mbretëreshë Sadijes, Princesha Senije ka kryer detyrat përfaqësuese të zonjës së parë deri në martesën e vëllait të saj me mbretëreshë Geraldinën në vitin 1938. Ndërkohë Princesha Ruhije u angazhua në arsim dhe të drejtat e gruas, Princeshe Myzejen në art e kulturë, ndërsa Princeshë Maxhide në sporte. Mediat vendase e ndërkombëtare do të përcjellin vazhdimisht aktivitetet e tyre dhe ata do të dominojnë kronikat sociale të kohës.
Do të ishte 28 shkurti i vitit 1938 kur tri motrat e mbretit Zog princeshat Ruhije, Maxhide dhe Myzejen do të udhëtonin për herë të parë në SHBA. Në këtë udhëtim ato do shoqëroheshin nga Abdurrhman Krosi. Në aeroport princeshat do të priteshin nga ministri i SHBA-së , Faik Konica.
Të gjitha gazetat e kohës do të flisnin për këtë vizitë të motrave të Zogut. Veçanërisht gazeta “Dielli” do t’i bëjë jehonë qëndrimit të tyre me kronika të përditshme.
Si të gjitha princeshat e kohës ato do vizitonin qendra të ndryshme sociale si institutin e vajzave “American Girl Scouts”, jetimore, spitale. “Princeshat janë të interesuara për punë mirëbërëse, si edhe në punë arsimore… dhanë ndihma për vajza të vobekta, lanë të holla në një jetimore dhe në një shtëpi me fëmijë të vobektë”, thuhet në artikullin e gazetës “Dielli”.
“New York Times” i përshkruan princeshat si tepër të bukura dhe me kulturë në një shkrim të 5 marsit 1938. “Janë princesha me kulturë e të bukura, janë princesha me tërë kuptimin e fjalës, si të gjitha princeshat e Europës. Nuk tymosin duhan, por janë moderne”, thuhet në shkrimin e “New York Times”.
Sipas medias amerikane, princeshat kanë pirë çaj dhe me zonjën e parë, gruan e Presidentit Roosvelt. Më 9 mars, gazeta “New York World” njoftonte se ato u pritën “si mysafire të qytetit” nga kryetari i Bashkisë së Nju Jorkut, La Guardia. Disa media do të shkruanin se “princeshat ndodhen në SHBA për t’u martuar”, gjë që do ta mërziste ambasadorin Konica. Princeshat u takuan dhe me Fan Nolin në Boston… “Si njeriu që kam ndenjur më tepër me princeshat në kohën që ndenjën këtu, mund të dëshmoj se kanë zemra të pastra, një dashuri të kthjelltë për Shqipërinë, një dëshirë të zjarrtë për të përmirësuar jetën e shqiptarëve, dhe një ndjenjë të lartë të detyrës si motra të mbretit dhe si të bijat e një oxhaku të vjetër”, do të shkruante Faik Konica në kujtimet e tij.
Pas Nju Jorkut, princeshat udhëtojnë drejt Londrës e më pas në Paris, dhe më 22 prill 1938, ato mbërrijnë në Tiranë. Në kancelaritë europiane, kjo vizitë e princeshave shqiptare u pa edhe si politike. Në Romë dyshuan se mos ky udhëtim i princeshave fshihte ndonjë qëllim politik, mos ishte një tentativë e Zogut për të gjetur investime financiare përtej oqeanit… Por, pavarësisht asaj çfarë fshihej përtej, përfaqësimi i princeshave shqiptare duket se ka qenë dinjitoz, nisur nga letra që ka mbërritur në oborrin e mbretit Zog, por edhe nga kujtimet e Faik Konicës.
(Kujtimet e Faik Konicës)/Konica.al/
