Nga Adriatik Doçi
Elvin Gogaj është prokurori i SPAK-ut, i cili po heton Belind Këlliçin për fshehje pasurie dhe falsifikim të diplomës së shkollës së mesme. Kandidati i dyshes Berisha-Meta për Bashkinë e Tiranë, i cili humbi vitin e kaluar me diferencë 60 mijë vota përballë Erion Veliajt, u kallëzua nga avokati i njohur Idajet Beqiri. Këlliçi doli pas tre orësh i nervozuar nga dera e SPAK-ut, ku mohoi falsifikimin e diplomës së shkollës së mesme si dhe u distancua nga partnerja e tij Anna Shkreli, duke mohuar bashkëjetesën me të, për të justifikuar mosdeklarimin e pasurisë së saj kur ishte deputet i PD-së. Mister mbetet burimi i të ardhurave për mbulimin e fushatës për Bashkinë e Tiranës si dhe pagesa prej 25 mijë USD për foton me Trump në një korridor në SHBA.
Po kush është Elvin Gogaj, i cili po heton Belind Këlliçin?
Gjatë karrierës së tij në prokurori, Elvin Gogaj ka shërbyer në pjesën më të madhe të kohës si drejtues në shtatë prokurori. Gogaj ka drejtuar në kohë të vështira prokuroritë në Sarandë, në Burrel, në Fier, në Elbasan, Kurbin, në Shkodër dhe Durrës.
Në korrik të vitit 2019, Komisioni i Vetingut (shkalla e parë), pezulloi një vit nga detyra prokurorin Elvin Gogaj, me kushtin e ndjekjes së trajnimit të detyrueshëm pranë Shkollës së Magjistraturës. Ky ishte vendimi i parë në zbatim të nenit Ë të Kushtetutës që parashikon masë disiplinore për kriterin e aftësive profesionale. Ndërkaq, Komisioneri Publik i kërkoi KPA shkarkimin e Gogajt nga detyra për një balancë negative prej 6 mijë eurosh.
Në nëntor të vitit 2020, Kolegji i Posaçëm i Apelit vendosi të rikthejë në detyrë prokurorin Elvin Gogajn, duke rrëzuar si Komisionerin Publik, ashtu edhe Komisionin e Vetingut. Sipas KPA, Elvin Gogaj ishte i aftë profesionalisht, pasuria e tij ishtë në përputhje me ligjin, ndërsa pastërtia e figurës së prokurorit nuk u vu asnjëherë në dyshim.
Në dhjetor të vitit 2021, Këshilli i Lartë i Prokurorisë emëroi Elvin Gogajn prokuror në SPAK.
Elvin Gogaj e ka nisur karrierën si prokuror në Burrel, ku ka hetuar dhe kopsitur disa dosje të rënda dhe të rëndësishme të viteve 1997-1998, periudhë kjo kur Burreli, ziente nga seritë e vrasjeve për shkak të hasmërisë mes dy bandave farefisnore “Dedja” dhe “Kola”. Në atë periudhë të përgjakshme, prokurorit Gogaj dhe gjithë prokurorëve që ushtronin detyrën në Burrel, i duhej të qëndronin në zyrë me automatikë kallashnikovi, pasi bandat në Burrel kishin marrë edhe komisariatin.
Edhe pse situata ka qënë në kufijtë e dramatikes për të bërë detyrën shtetërore, sot shumë dosje hetimore dhe dënimi i anëtarëve të këtyre bandave, mbajnë firmën e Elvin Gogajt dhe dy prokurorëve të tjerë që vepronin në atë periudhë në Burrel.
Pas Burrelit, Gogaj është transferuar nga kryeprokurori i Përgjithshëm i kohës, Arben Rakipi, në qytetin e Vlorës, duke ju besuar posti i zv/drejtuesit të prokurorisë së Sarandës, detyrë të cilën e ka kryer për disa vite. Gogaj goditi disa grupe kriminale, duke dokumentuar veprimtarinë e tyre kriminale.
Me ardhjen e Theodhori Sollakut në krye të Prokurorisë së Përgjithshme, Elvin Gogaj, emërohet drejtues në Prokurorinë e Fierit, prokurori e nxehtë kjo për sa i përket kriminalitetit dhe sofistikimit të krimit.
Me ikjen e Sollakut dhe ardhjen e kryeprokurores Ina Rama, Elvin Gogaj është transferuar nga prokuroria e Fierit në prokurorinë e Elbasanit, në të cilën Ina Rama i besoi për gati 7 vite drejtimin e kësaj prokurorie.
Pikërisht në këtë prokurori, Elvin Gogaj, për shkak të detyrës së tij pati kërcënime me jetë nga një grup kriminal në Elbasan, i ekspozuar shpesh kohët e fundit në media. Kjo solli që ministria e Brendshme t’i garantonte jetën me efektivë të repartit “RESI” në Tiranë.
Me ikjen e Ina Ramës dhe ardhjen si kryeprokuror të Adriatik Llallës, Elvin Gogaj është transferuar në një tjetër prokurori problematike siç është prokuroria e Laçit.
Pikërisht në këtë detyrë ai ka qëndruar gati 1 vit dhe më pas është emëruar nga Adriatik Llalla në krye të prokurorisë së Apelit Shkodër, duke i besuar të mbulojë çështjet penale të rretheve Shkodër, Lezhë, Kukës, Laç, Pukë dhe Tropojë. Edhe pas ikjes së Adriatik Llallës, Elvin Gogaj është konfirmuar në detyrën e drejtuesit të Apelit Shkodër nga kryeprokurorja e përkohshme Arta Marku.
Në shtator 2021, tre muaj para se të emërohej në SPAK, Këshilli i Lartë i Prokurorisë ka emëruar prokurorin Elvin Gogajn në krye të Prokurorisë së Durrësit me 11 vota pro. Tre vjet pas emërimit në SPAK, Gogaj ka në dorë disa dosje, përfshirë edhe një dosje të Arben Ahmetajt për tjetërsimin e pasurive publike, duke i kaluar në pronësi të miqve të tij.
