Ish-presidenti Ilir Meta vijon lëvizjet e tij alarmante pas dështimit të skenarit të arratisjes dhe strehimit politik nga frika se SPAK do të lëshojë një urdhër arresti për pastrim parash, mashtrim me pasurinë, pasuri të paligjshme, falsifikim kontratash, plaçkitje të pasurive publike, shantazh, trafiqe dhe për një sagë krimesh të tjera të konsumuara gjatë dy dekadave të fundit.
I informuar rreth zhvillimeve të fundit në Prokurorinë e Posaçme për dy dosjet e tij penale më të nxehta, lobimi dhe CEZ-DIA, Ilir Meta dyshohet se tentoi të arratiset nga frika e një arrestimi të mundshëm. Madje burime brenda Ministrisë së Jashtme bëjnë me dije se ky institucion mori sinjale nga një shtet i BE se Ilir Meta kishte nisur procedurat e letrave për azil.
Por mesa duket ai është përballur me të papritura dhe kjo mundësi i është djegur. Kjo ka bërë që ish-presidenti të përdorë kartën e tij të fundit njësoj si ish-kryeministri Sali Berisha; të mbrohet me akuza politike përballë prangave të SPAK. Në 3 ditët e fundit Meta ka filluar sulmet e forta të cilat kanë vetëm një qëllim, të godasin SPAK. Pra ish-presidenti është duke përgatitur terrenin për ta denoncuar arrestimin e tij të pritshëm si një akt politik të Edi Ramës.
Ai prej disa kohësh fokusin kryesor e ka çuar tek hetimet për inceneratorët, ku sipas tij, koka kryesore është Edi Rama pasi drejtësia nuk vepron edhe pse vazhdojnë hidhen miliona në një gjë që nuk ekziston. Meta e quan drejtësinë me regji dhe prokurorët specialë vartës së Edi Ramës të cilët përdoren për të goditur sipas Metës opozitën e vërtetë dhe të shfokusojë opinionet publikë nga skandalet qindra miliona euro.
Por kjo akuzë bie, pasi SPAK gjysmën e qeverisë po e çon në burg dhe shumë ministra,-ish-ministra e deputetë socialistë i ka nën hetim dhe çështje kohësh priten dhe fletë-arreste. Nisur nga interesi politik dhe pozitat e pushtetit, Edi Rama jo vetëm nuk ka asnjë interes për futjen në burg të Ilir Metës, por përkundrazi, kërkon të ruhet pakti i heshtur i cili i mban ende në këmbë në skenën politike.
Sulmet e Metës ndaj SPAK
Përpara disa muajsh Meta falënderonte SPAK për arrestimet që bënte në qeveri, ndërsa tani që laku i ka ardhur tek fyti, situata ka ndryshuar. Sipas Metës organi më i madh i drejtësisë tashmë është kthyer në një nga bizneset më të mëdha të qeverisë. Madje Meta kur u pyet edhe për deklaratën e Berishës, që nuk përjashtoi as grevën e urisë tha se do të jetë në bashkëpunim me ish-kryeministrin.
“Mendoj që ka qenë një grevë urie që i dha një goditje të fortë sistemit. Ne do të jemi në bashkëpunim, në koordinim me PD, dhe faktorët e tjerë që duan një opozitë të fortë, në kontribut të rivendosjes së llogaridhënies. Për këtë gjë do të bëjmë gjithçka që është e domosdoshme”, tha Meta. Frika e arrestimit i ka bashkuar sërish të dy më shumë se kurrë.
Po për çfarë rrezikon të arrestohet Meta?
Ilir Meta rrezikon të arrestohet për dosjen e lobimit në SHBA, pas ardhjes së letërporosive nga Shtetet e Bashkuara të Amerikës, ku janë konfirmuar shpenzimet gjatë viteve 2016-2017, me para që nuk janë deklaruar në organet përkatëse në Shqipëri. Dosja është në duart e prokurorëve Sotir Kllapi dhe Arben Kraja.
Ky i fundit ndodhet dhe në një vizitë në Uashington me kreun e SPAK Altin Dumani dhe prokurorë të tjerë. Ilir Meta ia ka faturuar përgjegjësinë e lobimit me para të pista Petrit Vasilit dhe Monika Kryemadhit, të cilëve Meta u la formalisht partinë pasi u emërua President nga Parlamenti. Por, hetimet kanë konfirmuar se Ilir Meta ka drejtuar faktikisht partinë, duke u kujdesuar edhe për lobimin me para të pista. /Elmas Bogdani
