Gjykata Kushtetuese pritet që shumë shpejt të ketë 9 anëtarë. Të shtunën Gjykata e Lartë mbylli garën për 3 vendet e fundit vakante dhe duket se puna nuk do të çalojë, sikundër ka ndodhur vitet e shkuara.
Kushtetuesja ka 9 anëtarë sipas ligjit, ku 3 i emëron Kuvendi, 3 Presidenti dhe 3 Gjykata e Lartë. Dy institucionet e para e kanë mbyllur këtë proces, por tashmë kanë ngelur 3 vakanca nga Gjykata e Lartë, e cila nuk bënte dot asnjë veprim sepse u boshatis nga vetingu.
Por duket se pengesat po eliminohen. Më 3 qershor u hap gara për 3 vende vakante në Kushtetuese dhe sot pritet që Gjykata e Lartë të informojë mbi ecurinë e procesit. Por gazeta ka mësuar në mënyrë jo zyrtare se cilët janë disa prej emrave që kanë kandiduar. Sipas informacioneve, ndër ata që kanë shfaqur interes është avokati i njohur Saimir Vishaj, juristi dhe pedagogu Ervin Karamuço si dhe një jurist pranë ILDKP.
Këta janë 3 emra të njohur dhe që kanë aplikuar deri të premten, por mund të ketë pasur aplikime dhe në minutat e fundit. Nëse i marrim me radhë, Vishaj është kreu i Shoqatës së Avokatëve Penalistë. Një ndër avokatët më të njohur në vend, jurist me përvojë të gjatë, njohës i çështjeve kushtetuese dhe mbështetës i reformës në drejtësi. Ervin Karamuço vjen nga radhët e pedagogëve.
Ai mban gradat profesor-doktor dhe jep mësim pranë Fakulteti Juridik në Tiranë. Karamuço ka përvojë të gjatë në botën akademike dhe ka bashkëpunuar në shumë projekte ndërkombëtare.
Emrat drejt KED
Emrat që kanë shfaqur interes do i dërgohen më pas Këshillit të Emërimeve në Drejtësi, i cili do të bëjë të gjithë procesin e verifikimit dhe për çdo vakancë pritet të dërgojë në Gjykatën e Lartë nga 3 emra. Nëse ky numër nuk arrihet, pritet të dërgohen më pak emra, pasi u vendos si precedent një vit më parë.
Javën e parë u dhanë sinjalet se edhe ndërkombëtarët i kanë sytë te KED. Ambasadori i BE, Luigi Soreca pati një takim me kreun e KED, Ervin Pupe. Sipas njoftimit për shtyp, Pupe e ka njohur Z. Soreca me veprimtarinë e deritanishme të Këshillit të Emërimeve në Drejtësi, duke vendosur thelbin në qëllimin kryesor të këtij Këshilli, në përmbushje të detyrimeve kushtetuese e ligjore, në përzgjedhjen e tre anëtarëve të rinj të Gjykatës Kushtetuese, për vitin 2021.
Ambasadori i Bashkimit Europian, shprehu gatishmërinë për të vijuar mbështetjen e KED me asistencë teknike sikurse është ofruar deri tani, duke kërkuar nga ky këshill të vijojë më të njëjtin përkushtim në plotësimin e vendeve vakante në Gjykatën Kushtetuese. Ambasadori Soreca theksoi rëndësinë që ka bashkëpunimi mes institucioneve kyç, për të bërë të mundur emërimin e tre gjyqtarëve të rinj të Gjykatës Kushtetuese, duke inkurajuar vijimësinë e suksesit të KED në këtë proces.
