Nga Anri Bala
Kuvendi i Shqipërisë në fakt, duhet të quhet “Kuqent”… ku kafshët lehin pa fre dhe asnjë motiv, duke fyer dhe kafshët e gjora, që janë qindra herë më inteligjentë dhe fisnik, e që nuk degradojnë çdo ditë, drejt llumit të menyrës së politikëbërjes.
Skenat e turpshme, jo se nuk kemi parë skena edhe më të turpshme se këto nga njerëz pa personalitet dhe identitet intelektual që pëllasin, kakarisin, ulërasin dhe në fund ia plasin: “Jemi përfaqësues të popullit”, por ndjehemi keq dhe të turpëruar si çdo qënie njerëzore në këtë vend, që i përfaqëson kjo lukuni pylli.
Kjo tufë e mbledhur aty nga kryetarët e partive, ca me mandat të blerë, ca me lidhjet farefisnore dhe klanore me shefat e tyre të përjetshëm, ca si specialist bythëlëpirës partish dhe kryetarësh e disa si qejflinj karrigesh pushteti, sot, jo që nuk përfaqësojnë shqiptarët, por po i vënë në hall edhe zagarët për cilësinë e lartë kafshërore që kanë, duke pritur të dalë lepuri i madh nga ferra e vogël, e zgjedhjeve të ardhshme.
Ndaj, është një rrezik i madh për vendin dhe demokracinë, lejimi i këtyre kafshëve të na përfaqësojnë në stallën moderne të Parlamentit, duke mos e kuptuar se janë në vendin e gabuar.
Por, a mundemi që stallat që kemi t’i kthejmë në salla kuvendore? Po… duke mos lejuar të viktimizohemi akoma nga partitë, që e kanë kthyer jetën e vendit në monopol.
Domosdoshmërisht, ka ardhur koha, që të votohen ata individë, që e duan këtë vend, që kanë një profil të lartë shoqëror, që politikën nuk e shikojnë si thes parash pa zot dhe kanë vizion dhe aftësi intelektuale të veçanta,që i dallon nga turmat. Kjo duket e largët për sa kohë sistemet zgjedhore në Shqipëri janë hibride dhe kaotike.
Ky vend, ka nevojë për sistem të pastër maxhoritar, duke ndaluar njëherë e mirë nga përfaqësimi i popullit, deputetët analfabet funksional nga habitati i “konellapsëve”, që qytetari të zgjedh përfaqësuesin e tij, që në përzgjedhje për kandidim, e deri në përfaqësim, në zonën ku është lindur, rritur dhe ku jeton.
Ky vend, ka nevojë për një parlament burrash shteti dhe kjo bëhet nëse intelektualët dhe akademikët shqiptarë, nuk fshehin kokën si struci nga frika e politikës, por bëjnë detyrën ndaj vendit në politik, për ta çuar shtetin, drejt prosperitetit dhe zhvillimit.
Ky vend, nuk ka nevojë për partiçka të vogla, që mbijnë si kërpurdha pas shiut nga rrënja e partisë së madhe… e që janë njëlloj helmuese.
Parlamentet nulave, kërriçave dhe nafijeve, që partia u jep dybekun ta tundin, edhe në Kuvend, edhe në rrugë, edhe në krevat… duhet të fshihet nga faqja e turpshme e shtetit 100 vjeçarë shqiptarë dhe këtë e kanë në dorë inteligjenca dhe qytetarët./Ekskluzive.al
