“Shumë njerëz nuk e dinë nga vij unë,” tha ylli i Miluoki Baks, Giannis Antetokounmpo.
“Shumë njerëz mendojnë se nëna ose babai im janë nga Greqia, por jo. Të dy prindërit e mi janë me ngjyrë. Të dy prindërit e mi janë nigerianë.”
Charles dhe Veronica Adetokunbo u shpërngulën nga Lagos në Greqi në vitin 1991 me shpresën për një të ardhme më të mirë për veten dhe familjen e tyre pasi u përpoqën të gjejnë punë. Djali më i madh i Adetokunbo, Francis, u la në Lagos për t’u rritur nga gjyshërit e tij.
Charles Adetokunbo punoi në kantieret e ndërtimit që ishin të shumta në Greqi në ato vite dhe gruaja e tij, Veronica si një kujdestare fëmijësh. Charles Adetokunbo ka edhe katër djem të tjerë, të gjithë të lindur në Greqi, përfshirë këtu, ylli i NBA Giannis që lindi më 6 dhjetor 1994.
Antetokounmpo u bë mbiemri i Giannis pasi u shkrua në këtë mënyrë në pasaportën e tij greke në vend të Adetokunbo, që është mbiemri në versionin nigerian.
Antetokounmpo u rrit me kulturën greke duke mësuar gjuhën, shkuar në shkollë dhe duke filluar të luante basketboll që në moshën 7-vjeçare. Por kur ai ishte në shtëpi me familjen e tij, ai gjithmonë ishte një nigerian, duke i ruajtur edhe traditat e vendit nga vinin prindërit e tij.
“Unë u rrita në një shtëpi nigeriane,” tha Antetokounmpo. “Natyrisht, unë kam lindur në Greqi dhe shkova në shkollë në Greqi. Por në fund të ditës kur shkoja në shtëpi, nuk kishte kulturë greke, por kulturë nigeriane. Ka të bëjë me disiplinën, respektimin ndaj prindërve dhe me moralin”.
Veronica Adetokunbo u fliste fëmijëve të saj në gjuhën nigeriane të Igbo, e cila është një nga katër gjuhët zyrtare nigeriane dhe është folur nga rreth 18 milionë njerëz në Nigeri dhe Guinenë Ekuatoriale. “Unë mund ta kuptoj atë pak, mund të llogarisë, por nuk flas rrjedhshëm,”- tha Antetokounmpo për gjuhën Igbo.
“Nuk është se unë mund të kthehem në shtëpi në Nigeri dhe ata mund ta kuptojnë atë që po them. Të dy prindërit e mi janë nga Nigeria. Por Nigeria është me 250 dialekte, për t’ua shpjeguar më mirë, nëna ime dhe babai im nuk flasin të njëjtën gjuhë.”
Hakeem Olajuwon, i cili është padyshim basketbollisti më i madh afrikan i të gjitha kohërave dhe një nga lojtarët më të mirë të NBA, gjithashtu ka një lidhje nigeriane me Antetokounmpo. “Unë e di se jemi nga i njëjti fis, nga fisi Joruba,”- tha Olajuwon. “Unë jam i sigurt se nigerianët janë shumë krenarë për të, veçanërisht për shkak të mënyrës se si ai është duke dominuar në NBA”, tha Olajuwon. “Ai ka arritur një sukses të madh në një periudhë kaq të shkurtër kohe.”
Me Baks që zotërojnë rekordin më të mirë në NBA, gjiganti prej 211 centimetrash Antetokounmpo është kandidati kryesor për të fituar çmimin NBA MVP (Lojtari më i mirë e vitit 2019), duke konkurruar ndaj James Harden të Hjuston Rokets, Paul George të Oklahomas dhe Stephen Curry me Kevin Durant të Golden Stejt. Antetokounmpo ka shënuar mesatarisht 27.1 pikë, ka 12.6 kërcime dhe gjashtë asistime këtë sezon. Me këtë performancë, ai udhëhoqi Miluoki Baks në Konferencën Lindore dhe mori më shumë vota për në All-Stars.
Por ambicia e Antetokounmpo nuk është vetëm kaq. Ai dëshiron të shkojë më larg. Ashtu siç këtë sezon ia doli të mposhtë në parket legjendën Lebron Xhejms, dëshiron ta bëjë edhe në karrierën e tij që premton të jetë e gjatë. Fundja, historia e jetës së tij dhe familjes nga ai vjen e ka treguar tashmë që në jetë çdo gjë është e mundur. “Unë nuk jam as afrikan dhe as grek,”- thotë Giannis Antetokounmpo, “Unë jam diçka në mes. Sigurisht duke marrë më të mirën prej të dyjave dhe nga SHBA, ku po jetoj tani.”
