Në një kohë kur shumica e vendeve po kalojnë drejt një shoqërie pa para të gatshme, Suedia dhe Norvegjia po ndryshojnë politikën e tyre. Këto dy shtete nordike, të cilat tradicionalisht kanë qenë liderë në përdorimin e pagesave elektronike, tani po rikthejnë përdorimin e parasë fizike si masë sigurie kundër krizave dhe sulmeve kibernetike.
Raporti i fundit i Bankës Qendrore tregon se Suedia dhe Norvegjia kanë nivelin më të ulët të parasë fizike në qarkullim si përqindje e PBB-së në botë. Në Suedi, vetëm një në dhjetë blerje bëhen me para të gatshme, ndërsa pagesat me karta bankare dhe aplikacione mobile janë më të shpeshta. Megjithatë, përballë kërcënimeve të mundshme gjeopolitike, qeveritë e këtyre vendeve po inkurajojnë qytetarët të mbajnë para fizike në dorë.
Ministria e Mbrojtjes së Suedisë ka shpërndarë një udhëzues me titull “Nëse vjen kriza ose lufta”, ku këshillohet përdorimi i parasë fizike dhe ruajtja e një furnizimi minimal për të paktën një javë. Po ashtu, qeveria suedeze ka propozuar që disa institucione publike dhe biznese private të detyrohen të pranojnë pagesa me para të gatshme, për të parandaluar përjashtimin e grupeve të caktuara të popullsisë.
Edhe Norvegjia ka miratuar një ligj që ndëshkon bizneset që refuzojnë pagesat me para fizike. Autoritetet paralajmërojnë se varësia e tepruar nga pagesat digjitale mund të bëjë qytetarët të pambrojtur ndaj sulmeve kibernetike. Ish-ministrja e Drejtësisë dhe Situatave të Emergjencës, Emilie Enger Mehl, theksoi se “nëse askush nuk përdor dhe nuk pranon para fizike, ato nuk do të jenë më një mundësi emergjente në rast krize.”
Kjo kthesë vjen në një kohë kur shumë shtete të tjera europiane po ecin drejt një shoqërie pa para të gatshme. Megjithatë, për Suedinë dhe Norvegjinë, siguria kombëtare duket se ka përparësi mbi modernizimin e pagesave.
