Prokuroria e Sarandës ka lëshuar 11 urdhër arreste ndaj 11 zyrtarëve që lejuan ndërtimin e një hoteli 7 katësh në bregdetin e Sarandës dhe më pas e legalizuan.
Pas lëshimit të urdhërarresteve nga Prokuroria e Sarandës u arrestuan 8 persona dhe u shpallën në kërkim 3 të tjerë.
Hoteli 7-katësh në bregdetin e Sarandës, për të cilin u lëshuar 11 urdhërarreste nga Prokuroria e Sarandës, rezulton në pronësi të ish-drejtorit të ALUIZNI-t, Mariel Mërtiri.
Ish-drejtorit të ALUIZNI-t, mësohet se kishte blerë godinën ekzistuese dhe ka marrë leje për rikonstruksion e hotelit.
Por Mariel Mërtiri e ka rrënuar të gjithë godinën dhe ka rindërtuar nga fillimi, madje duke shtuar edhe kate shtesë.
Më pas ai ka arritur ta legalizojë hotelin pa leje, i cili është vendosur në funksion prej rreth 2 vitesh.
Veprimet Mariel Mërtiri i ka kryer pasi ka lënë detyrën e drejtuesit të ALUIZNI Sarandë dhe ishte emëruar në një detyrë tjetër drejtuese.
Njoftimi i prokurorisë:
Lejuan ndërtimin e një objekti 7-katësh pranë vijës bregdetare, Prokuroria Sarandë kërkon arrestimin e 11 zyrtarëve
Tetë persona janë arrestuar me urdhër të Prokurorisë pranë Gjykatës së Parë të Juridiksionit të Përgjithshëm Sarandë, pasi në kundërshtim me ligjin lejuan ndërtimin e një objekti 7-katësh, hotel, pranë vijës bregdetare në qytetin e Sarandës dhe proceduan me legalizimin tij. Ndërkohë që tre persona të tjerë janë ende në kërkim.
Të 11 të pandehurit, pjesë e procedimit penal nr.37 të vitit 2024, janë nën hetim për veprat penale ‘falsifikimi i dokumenteve”, “ndërtim i paligjshëm” dhe “shpërdorim i detyrës”, parashikuar nga nenet 186, 199/a/4 dhe 248 të Kodit Penal.
Pas administrimit të provave në funksion të këtij procedimi penal, nga prokurori është urdhëruar ndalimi i 11 shtetasve me detyra dhe funksione te ndryshme shtetërore prej të cilëve është bërë i mundur ekzekutimi i ndalimit të 8 prej tyre të identifikuar si më poshtë;
E.S – Specialist/inxhinier në Sektorin e Hartografisë pranë DVASHK Sarandë;
E.L – Specialist/inxhinier në Sektorin e Hartografisë pranë DVASHK Sarandë;
I. P – Specialiste ne Drejtorine vendore të Ashk Sarandë;
V.Q – Inspektor pranë IVMT, Bashkia Sarandë;
T.S – Inspektor pranë IVMT, Bashkia Sarandë;
O.D – Inspektor pranë IVMT, Bashkia Sarandë;
D.B – Specialist/inspektor në Sektorin e Inspektimit të Territorit pranë Drejtorisë Rajonale IKMT Vlorë; dhe
M.S – Specialist/inspektor në Sektorin e Inspektimit të Territorit pranë Drejtorisë Rajonale IKMT Vlorë
Nga policia gjyqësore vijon kërkimi për ndalimin edhe të tre shtetasve të tjerë.
Prokuroria pranë Gjykatës së Parë të Juridiksionit të Përgjithshëm Sarandë, po vijon veprimet hetimore për identifikimin dhe marrjen në përgjegjësi penale edhe të personave të tjerë të përfshirë në veprime të paligjshme dhe shkelje ligjore në ushtrim të detyrave shtetërore.
