Gjykata e Apelit për Krime të Rënda pranoi këtë të mërkurë të ndryshojë masën e sigurisë për dy prej të arrestuarve të operacionit “Vol-vo 4”, duke bërë që numri i të prangosurve, që u është ndryshuar masa e sigurisë duke iu zbutur, të shkojë në 14.
Kështu, Apeli pranoi kërkesën e Orges Jahelezit dhe Saimir Sulejmanit, duke i lënë ata në masën e sigurisë “Arrest shtëpie”.
Kujtojmë se, gjatë operacionit të zhvilluar në 12 qytete u arrestuan 34 të persona nga të cilët fillimisht u lanë në burg vetëm 24 prej tyre. Në këtë operacion u arrestuan edhe dy ish-deputetë të Partisë Socialiste, Arben Ndoka dhe Arben Çuko.
Arben Ndoka u arrestua, pasi gjatë hetimeve të kryera për procedimin penal për trafikimin e lëndëve narkotike, ka dalë në përgjime teksa kontaktonte me një person që do t’i kërkonte favorizim për një të dënuar.
Sipas hetimeve, dyshohet se Çuko, në këmbim të një shume monetare dhe një makine do të transferonte një të burgosur.
Ndërkohë, Arben Ndoka është arrestuar për akuzën se ishte pjesë e një skeme tjetërsimi pronash në Shëngjin. Edhe dy ish-deputetët janë liruar nga Gjykata.
Hetimet për shkatërrimin e 4 bandave kishte nisur që në vitin 2016, ndërsa janë vënë në përgjim një sërë personash.
Nga ky procedim, sipas Prokurorisë, kanë dalë në përgjime se anëtarë të këtyre grupeve kriminale kanë ndikuar në mënyrë të paligjshme edhe në funksionarë të administratës publike dhe jo vetëm, duke bërë që të regjistrohen procedime dhe të vijojnë hetime të tjera për korrupsion.
