Për juristin Romeo Kara, kontrata 6 milionë dollarë e lobimit të PD në SHBA, është rast i pastër korrupsioni. I ftuar ditën e sotme në emisionin ‘Studio Live’ në Report Tv me gazetarin Arbër Hitaj, juristi tha se kjo është kontrata më e shtrenjtë e lobimit që mund të jetë bërë ndonjëherë.
‘Kemi të bëjmë me një rast të pastër korrupsioni dhe pastrim parash dhe fondacioni është krijuar vetëm pak ditë para se të firmosej kontrata. Për mua nuk ka bazë që ky fondacion ka dhënë prova që është fondacion nga shqiptarët, nuk shpjegon se nga është burimi i parave. Për mua është kontrata më e shtrenjtë dhe më e madhe e lobimit që mund të jenë bërë nga shtetet jo më nga individë. Mendoj se kjo shifër do të përbëjë shkak që kjo të hetohet edhe nga vet departamenti i drejtësisë në SHBA, duhet që të dihet se kush është burimi i parave.
Është një nga skandalet më të mëdha. Përfshirja e një fondacioni këtu është për të fshehur gjëra të tjera. Politikisht dhe juridikisht, kjo parti nuk mund të thotë se nuk mbaj përgjegjësi, këta kanë përfituar nga ky donacion, por duhet që të bëhet transparencë. Këtu kemi një pagesë. Kjo duhet që të jetë subjekt i një hetimi edhe nga SPAK’, tha ai.
Për juristin, SPAK duhet që të veprojë pasi ky është një krim. Juristi tha se Berisha kërkon që të marr peng drejtësinë amerikane.
‘SPAK duhet që të veprojë. Këta kanë hedhur para të paligjshme në sasi dhe në burim. Këta kanë dhënë këto para dhe u kapën, po si mund të funksionojë kur zbulohet krimi dhe nuk dënohet. Unë them se ky është krim. Gërdeci dhe ‘97 nuk shbëhen më dhe këta duan që këto mëkate ti mbulojnë me mëkate të tjera. Me politikën e Berishës u vranë shumë njerëz, ai vetëm në Tropojë varu 200 e ca njerëz me politikën e tij, i iku koha. Dhe ai do të rrijë aty akoma. Ai do të marr peng drejtësinë amerikane. Këto 6 milionë janë kot këta kanë biliona’, tha ai.
Për kandidatin e Koalicionit Euroatlantik Azgan Haklaj, kontrata e lobimit të PD është një krim zgjedhor. Ai tha se Berisha s’mund të heq non grata me para. Sipas tij ato para, janë nga oligarkët dhe jo të Nuredin Secit.
‘Kjo kontratë është bërë në kohën e zgjedhje dhe është krim. Këtë e ka firmosur Noka, ku e firmosi ai, ai s’ka shkuar në Amerikë. Ai nuk shkoi dhe e ka firmën aty. Ky është një akt i tmerrshëm, SHBA po heton dhe janë duke hetuar gjatë këtyre viteve sepse paratë e shqiptarëve janë vjedhur këtu dhe janë transferuar. Ky është akti më i rëndë në një shtet normal duhet që të ishte pezulluar fushata, i bëjë thirrje demokratëve që ta braktisin sepse me paratë që ka vjedhur Berisha duke bashkëpunuar me Ramën po përpiqet që të heq non gratën. Ai kërkon që të blejë Amerikën, lekët janë lekë oligarkësh, jo të Nuredin Secit. Duhet që të thuhet nga janë marr paratë, kush është financues i tyre. Berisha s’duhet që të bëjë lobim që të heq non gratën’, tha ai.
Partia Demokratike ka firmosur një kontratë lobimi prej 6 mln dollarë në SHBA që do të paguhen në arkat e ‘Continental Strategy’ nga selia blu, 250 mijë dollarë në muaj, 750 mijë USD janë dhënë njëherësh për 3 muajt e parë, të parapaguara.
“Make Albania Great Again”, fondacioni që ka marrë përsipër të mbulojë deri 6 milionë dollarë, pagesa për lobimin e partisë Demokratike në Shtetet e Bashkuara, është një organizatë e familjes së Nuredin Secit. Fondacioni u themelua vetëm pak ditë përpara firmosjes së kontratës, në të cilën, krahas emrit të Flamur Nokës, është vetëm ai i shqiptaro-amerikanit Nuredin Seci, në rolin e garantorit dhe personit që do të kryejë pagesat.
Në periudhën shkurt prill 2025 kjo firmë ka lidhur 5 kontrata ku në vend të parë me shumën 250.000 dollarë në muaj renditet PD e Shqipërisë, me një diferencë të theksuar nga të tjerat. Kontratën 6 milionë dollarëshe Flamur Noka e firmosi në emër të të gjithë koalicionit “Aleanca për Shqipërinë Madhështore’.
Për këtë kontratë, Prokuroria e Posaçme njoftoi se nisi hetimet menjëherë. Tashmë përmes hetimit do t’i takojë SPAK të tregojë burimin e financimit marramendës, për një kontratë që është më e shtrenjta në historinë e lobimeve në politikën shqiptare.
