Shqipëria do të përfaqësohet me 9 sportistë në Lojërat Olimpike që do të mbahen në Tokio më 23 Korrik. Përpara nisjes drejt Japonisë së sportistëve shqiptarë, në një ceremoni të mbajtur pasditen e së mërkurës në Pallatin e Brigadave, Kryeministri Edi Rama tha se Komiteti Olimpik ka bërë një punë më të mirë se vitet e kaluara me sportistët elitarë të vendit tonë.
“Është një moment gjithmonë i veçantë për sportin kur është viti i Olimpiadës dhe emocion shumë i veçantë për pjesëmarrësit në Olimpiadë. Më vjen shumë mirë që në këtë Olimpiadë të Tokios është bërë një përgatitje ndjeshëm shumë herë më mirë se çdo herë tjetër.
Më vjen mirë që kemi pasur mundësinë të jemi pranë Komitetit Olimpik dhe këtyre sportistëve me aq sa kemi mundur, edhe falë dhe përfshirjes së Bashkisë së Tiranës dhe kryetarit të Bashkisë Tiranë është bërë e mundur një trajtim dinjitoz i gjthë anëtarëve të këtij misioni edhe pse nuk diskutohet që e mira s’ka fund dhe ne kemi plot gjëra për të përmirësuar.
Dua të them se e kam pritur me shumë kënaqëso lajmin e zgjedhjes së Fidelit si kryetar i Komitetit Olimpik. Nuk kemi arritur dot në vite të tëra që ta motivojmë Komitetin Olimpik për te qenë në lartësinë e misionit të vetë.
Dhe misioni i Komitetit Olimpik është që të qëndrojë edhe pranë sportistëve elitarë, të përgatisë misionet sportive në aktivitetet mbarë ndërkombëtare, por misioni themelor i Komitetit Olimpik është krijimi i lëvizjes olimpike. Dhe nuk mund të ketë lëvizje olimpike pa një ndërthurje të gjithë energjive mes qeverisë, bashkive dhe Komitetit Olimpik duke filluar nga fëmijët, duke vazhduar me gjimnazet dhe me universitetet”.
Kreu i qeverisë foli edhe për mbështetjen që do të japë kabineti i ri qeveritar përmes projekteve konkrete të programit të tretë qeverisës. Dhe për këtë, Rama u shpreh se do të ketë një bashkëpunim mes qeverisë dhe Komitetit Olimpik, por gjithashtu do t’i jepet prioritet edhe sportit nëpër gjimnaze e universitete.
“Ne jemi shumë të dëshiruar dhe motivuar që të japim një shtytje të re të gjithë lëvizjes sportive në shkolla. Mendojmë që janë krijuar kushtet që kjo lëvizje të hyjë në një fazë të re dhe në gjithë rrjetin e shkollave, gjimnazeve, të fillojë një lëvizje e organizuar që sidoqoftë varet në një masë të konsiderueshme nga Komiteti Olimpik.
Dhe pas misionit olimpik në Tokio do ulemi së bashku me komitetin për të hartuar një program të përbashkët, për të shpjeguar programin tonë të ri të mandatit të 3 lidhur me sportin dhe prioritetin që është sporti për fëmijët, për gjimnazet, për universitetet dhe për të nisur një rrugëtim të përbashkët që në 4 vitet e ardhshme ta ngremë lëvizjen olimpike shqiptare në një nivel më të qëndrueshëm dhe ta nxjerrim nga kjo fazë embrionale”.
Kryeministri premtoi se mbështetja për sportistët do të vazhdojë edhe pas përfundimit të Lojërave Olimpike.
“Mbështetjen që ne i kemi dhënë këtë herë anëtarëve të misionit olimpik nuk do ta ndërpresim me përfundimin e Olimpiadës. Do të garantojmë një plan të qëndrueshëm që jo vetëm këta sportistë të ndjejnë mbështetjen e vazhdueshme por edhe ata që janë më të rinj të mund të mbështeten pa pritur që ata të kalojnë nëpër sakrifica nga më të hatashmet, por duke ju dhënë gjithë mbështetjen që mund t’ju japim”.
