Ish-kryeministri Sali Berisha është shpallur “non grata” edhe nga Britania e Madhe. Ky është vendi i dytë pas Shteteve të Bashkuara të Amerikës që shpall të padëshirueshëm Sali Berishën, lajm ky që fillimisht u zbulua në Shqipëri nga gazeta “SOT”, ndërkohë që dje është e ka konfirmuar edhe vetë Sali Berisha në konferencën për shtyp.
Ai është shpallur “non grata” nga Mbretëria e bashkuar pasi akuzohet për lidhje të qarta me grupe të krimit të organizuar dhe kriminelë, ndërsa zoti Berisha ka deklarua se akuzat e Britanisë së Madhe për shpalljen e tij “non grata” janë bazuar në shpifje. Mirëpo, këto pretendime të kreut të “Foltores” janë rrëzuar dje nga Londra zyrtare dhe nga media amerikane, “Zëri i Amerikës”, të cilat kanë treguar detaje nga dosja voluminoze që britanikët kanë ndaj e ish-kryeministrit.
Ka qenë Ambasada e Britanisë së Madhe në Shqipëri, e cila njoftoi dje se Britania e Madhe nuk synon asnjë parti apo grup politik dhe se sipas saj, vendimi kundër Berishës është marrë bazuar në fakte dhe në koordinim të plotë me SHBA-të. “Shumë faleminderit që më kontaktuat. Më poshtë keni përgjigjet e pyetjeve tuaja. Këtë javë ne kemi ndërmarrë veprime ndëshkuese ndaj disa individëve shqiptarë të publikuar gjerësisht dhe që janë të dokumentuar që kanë lidhje në veprimtari kriminale dhe korrupsioni .Është politika e Home Office që të mos komentohet mbi statusin e imigracionit të individit.
Prandaj, ne nuk mund të konfirmojmë emra. Britania e Madhe nuk synon asnjë parti apo grup politik. Kjo është një qasje e balancuar. Bëhet fjalë për individët dhe lidhjet e tyre me kriminalitetin dhe korrupsionin. Këto vendime merren në mënyrë të pavarur, për interesat kombëtare të Britanisë së Madhe. Por sigurisht, ne i diskutojmë me një gamë të tërë partnerësh tanë të ngushtë, përfshirë Shtetet e Bashkuara”, thuhet në reagimin e Ambasadës së Britanisë së Madhe në Shqipëri për mediat shqiptare.
“Zëri i Amerikës”: Çfarë thotë Londra për “non grata-n” e Berishës
Ndërkohë edhe “Zëri i Amerikës” ka dhënë dje detaje nga shpallja “Non Grata” e ish-kryeministrit Sali Berisha nga Britani e Madhe. Në shkrimin e saj, “VO” thotë se ish-presidenti Sali Berisha u shpall dje “Non Grata” nga Britania e Madhe për lidhje me grupe të krimit të organizuar dhe pasurim përmes korrupsionit për vete dhe rrethit të njerëzve pranë tij.
Në letrën zyrtare nga Londra drejtuar zotit Berisha theksohet se ai mban lidhje me kriminelë që paraqesin rrezik për sigurinë publike në Shqipëri dhe Mbretërinë Bashkuar, të cilat ai është i gatshëm t’i përdorë për të arritur ambiciet e veta politike, shprehet “Zëri i Amerikës”. Më tej media amerikane thekson se përmbajtjen e njoftimit e bëri publike vet zoti Berisha, i cili i hodhi poshtë këto akuzua si “vazhdim i shpifjeve dhe gënjeshtrave” të sponsorizuara nga Edi Rama dhe “lobimit korruptiv” të tij dhe George Soros.
“Kjo synon kthimin e Shqipërisë në një vend pa opozitë, së cilës i rripet çdo pasuri, e nga e cila shqiptarët ikin nga sytë këmbët. Kjo synon mbajtjen në pushtet të një qeverie, më e korruptuara në Europë”, deklaroi zoti Berisha. Kujtojmë se Departamenti Amerikan i Shtetit njoftoi në maj të vitit të kaluar ndalimin e hyrjes në territorin e Shteteve të Bashkuara, për ish kryeministrin Sali Berisha e familjen e tij, për shkak të “akteve të rënda të korrupsionit” dhe “minimit të demokracisë”.
