Lëvizja Socialiste për Integrim ka shpërthyer dje në akuza të ashpra në adresë të qeverisë dhe kryeministrit Edi Rama. Teksa ishte e ftuar në një studio televizive, ish-deputetja e LSI, Silva Caka akuzoi kryeministrin Edi Rama se ka rrënuar ekonominë dhe ka kapur sistemin e drejtësisë në vend.
Në këtë pikë, zonja Caka theksoi se është absurde që opozita të ulet në tryezën e dialogut me mazhorancën, për sa kohë Partia Socialiste dhe lideri i saj nuk reflektojnë, duke marrë në konsideratë propozimet e Gjermanisë dhe ato të partive të kampit opozitar. “Ftesa për dialog do të duhej që të vlerësohej, por më parë duhet të plotësohen disa kushte. Kushtet janë ato që vendosi Bundestagu gjerman, reforma zgjedhore, çlirimi i drejtësisë, ekonomia. Pa u përmbushur disa kritere themelore, është e pamundur që të diskutohet.
Për çfarë do të dialogojmë me Edi Ramën? Dialogu me të është i pamundur. Nuk ka asnjë pikë ku kjo opozitë takohet me Edi Ramën”, deklaroi ajo. Më tej, ish-deputetja Silva Caka zbuloi se në fillim të 2020 Lëvizja Socialiste për Integrim do të dalë me propozime konkrete për reformën zgjedhore. Sipas saj, LSI gjatë gjithë kësaj kohe ka qenë duke punuar për këto propozime. “Ne kemi punuar intensivisht për reformën zgjedhore. Jemi ende duke punuar dhe besoj se janari do të na gjejë me një propozim konkret për reformën zgjedhore.
E kemi thënë që në krye të herës që do të ishim tepër seriozë dhe të shpejtë. Vetëm shpejtësia nuk është përmbushur. Nëse nuk do të kishte ndodhur fatkeqësia, produktin tonë përfundimtar do ta kishim gati në dhjetor. Produkti ynë do të jetë gati në janar, një produkt i sinqertë që jep demokraci reale për shqiptarët”, u shpreh ajo. Ndërkohë, duke folur për mini-Shengenin, zonja Caka e cilësoi takimin që u mbajt në Tiranë si diçka të errët që nuk u shërben interesave të shqiptarëve.
“Ka pikëpyetje shumë të mëdha mbi këtë iniciativë. Ka edhe nota shumë të errëta që janë antishqiptare. Nuk është përshëndetur nga shumë vende të rajonit dhe as nga Europa. Në këto kushte, e gjykojmë si diçka që nuk vjen në të mirë të shqiptarëve, por i shërben një axhendë serbe antishqiptare”, nënvizoi ish-deputetja e Lëvizjes Socialiste për Integrim, Silva Caka.
