Lëvizja Socialiste për Integrim ka filluar të hakmerret ndaj Partisë Socialiste. Edhe pse pas marrjes së mandatit të dytë qeverisës, kryeministri Edi Rama ka larguar një pjesë të madhe të drejtorëve të LSI, të cilët ishin pjesë e administratës publike, e njëjta gjë nuk mund të thuhej për bashkitë, pasi deri diku kishte një “armëpushim” mes palëve, në sajë të së cilit nuk ka pasur shkarkime punonjësish. Mirëpo, kjo “paqe” nuk ka zgjatur shumë, pasi jo më larg se dy ditë më parë me urdhër të kryetares së LSI, Monika Kryemadhi, kryebashkiakja e Gjirokastrës, Zamira Rami ka shkarkuar nga detyra tre administratorët e propozuar nga Partia Socialiste pas zgjedhjeve vendore të vitit 2015. Bëhet fjalë për administratorin e Lazaratit, Mexhit Jupi; të Cepos, Leonard Mustafaraj dhe Picarit, Krenar Koshi. Madje, burimet i thanë gazetës se paraprakisht, Rami i ka thirrur administratorët në zyrën e saj, teksa u kërkuar atyre të japin dorëheqjen nga detyra që mbajnë prej korrikut të vitit 2015. Ndërsa pas refuzimit nga ana e tyre të dorëheqjes vullnetare, kryebashkiakja i ka shkarkuar ata. Megjithatë, burimet thanë se njësoj siç veproi me shkarkimin e nënkryetarit të bashkisë Ylli Muho pak kohë më parë, edhe në këtë rast nuk jepet motivacioni i largimit nga puna, por nuk është e vështirë të merret me mend. Ky vendim vjen fill pas protestës së fundit të opozitës dhe urdhrit të Kryemadhit, duke iu hapur udhë kështu, zëvendësimit të tyre me militantët të tjerë, të mbetur pa punë pas daljes në opozitë. I njëjti urdhër ka vajtur dhe për kryebashkiakët e tjerë dhe ata do të nisin shkarkimet.
Hyn në lojë PD
Burimet i thanë gazetës se këto pozicione do t’u jepen njerëzve të PDsë, parti me të cilën tani LSI-ja është në koalicionin opozitar. Si duket përmes këtij veprimi, Kryemadhi ka aktivizuar planin B, në sajë të së cilit synon të bindë skeptikë brenda Partisë Demokratike, se ajo dhe partia e saj, tanimë janë në një koalicion solid, duke ndarë me njëra-tjetrën edhe “tepsinë” e pushteti. Gjithashtu, mësohet se hakmarrje mes aleatëve, nuk do të ndalet me kaq pasi se në ditët në vijim pritet nis një tjetër valë shkarkimesh në bashkitë e drejtuara nga LSI, ku është urdhëruar që të gjithë militantët, punonjësit e thjeshtë të PS të shkarkohen. Pra, plani është i qartë. Me PS-në nuk i lidh më asgjë, koalicioni është prishur më 25 qershor, prandaj nuk ka nevojë të vazhdohet më tej të mbahen në funksione publike njerëz të propozuar nga socialistët sikundër ishin tre administratorët e Lazaratit, Cepos dhe Picarit. Sidoqoftë mbetet për t’u parë në ditët e ardhshme se si do të rrjedhin gjërat.
Veliaj shkarkoi administratorët e LSI
Përplasjet mes PS dhe LSI nuk janë të panjohura për publikun dhe politikën, sidomos pas zgjedhjeve të 25 qershorit, kohë kur këto parti u ndanë përgjithmonë nga njëra-tjetër. Ndërsa kjo hakmarrje reflektoi edhe në administratën publike, ku viktima ishin drejtuesit dhe militantët partiak. Ka qenë, kryebashkiaku i Tiranës, Erion Veliaj, ai i cili në shenjë hakmarrje ndaj LSI, shkarkoi pak ditë më parë nga detyra Administratorët e katër Njësive të Bashkisë së Tiranës, të cilët ishin përfaqësues të LSI. Kështu, me vendim të Veliajt u largua nga detyra kreu i njësisë nr.2, Elez Gjoza, ai i njësisë nr. 8, Erjon Xhafa, i njësisë nr. 11. Gentian Arapi dhe Refik Veliaj administrator i Bërzhitës./SOT
