Ditën e djeshme Lulzim Basha, me mbështetjen e fortë të amerikanëve nga pas, është politikani i parë shqiptar në këto 30 vite, që i tregoi vendin Sali Berishës. Ish-kryeministri, që prej nisjes së angazhimit të tij në fund të viteve ’80 si pjesë e pandarë e politikës në vend, duke i provuar të gjitha pozicionet politike, iu ka rezistuar politikanëve “të peshës së rëndë”, si Fatos Nano, Ilir Meta, Pandeli Majko, apo edhe Edi Rama.
Sali Berisha është njeriu që i ka mbijetuar skandaleve të panumërta, para se të “gozhdohej” në një pozitë që nuk ka qenë kurrë më parë nga vetë Lulzim Basha, politikani që mendonin të gjithë se ishte kukull e Sali Berishës, por që në fund vërtetoi të kundërtën. Dje mund ta themi hapur se Basha spastroi nga politika shqiptare Berishën pasi Gjykata e Apelit vendosi rrëzimin e vendimit të Agron Zhukrit dhe kthimin e çështjes për shqyrtim në shkallë të parë me trupë tjetër gjykuese.
Pas këtij vendimi, ajo që vendosi Agron Zhukri konsiderohet nul dhe çështja kthehet në shkallë të parë. Tashmë vula, sigla, logoja e Partisë Demokratike i mbetet Lulzim Bashës, se zyrtarisht ai është i regjistruar në Gjykatën e Tiranës, dhe pritet që të jetë grupi i Alibeajt që të regjistrohet me logon e forcës më të madhe opozitare në vend për zgjedhjet e ardhshme të 14 majit. Ish-kryeministri ka paralajmëruar se do të bëjë rezistencë, por më e keqja për kreun e Foltores ende nuk ka ardhur.
Reagimi i avokatit
Avokati i PD-së së Alibeaj, Indrit Sefa sqaroi dje se ky grupim do të regjistrohen në KQZ për zgjedhjet e 14 majit. “Gjykata vendosi rikthimin e çështjes në shkallën e parë, kërkesë e jona. Praktikisht u pranua ankimimi i Alibeajt dhe kjo do të thotë që çështja do rikthehet në gjykatën e shkallës së parë dhe do ketë një tjetër trup gjykues. Do regjistrohemi në komisionin qendror të zgjedhjeve brenda këtyre ditëve. PD ka organet legjitime të saj që do të vazhdojnë drejtimin e saj. Nuk është çështje godinash as vulash është çështje mentaliteti. Legjitimiteti u vërtetua. PD ka një seli dhe është ajo zyrtarja. Organet legjitime të PD administrojnë të gjithë infrastrukturën e PD. Nuk e dimë se kur do të shprehet Gjykata e Shkallës së Parë,” tha Sefa ndër të tjera
Berisha “fosile” politike
Vendimi kundër tij nga Apeli i hoqi administrimin e selisë blu. Tani ky është fundi i tij politik dhe “mburoja” e tij kundër drejtësisë dhe amerikanëve ra. Berisha tani i humbi të gjitha. Ai nuk e ka dashur kurrë PD si politikan i ndershëm, që ta vejë kauzën e saj në dobi të vendit e demokracisë, as si pushtetar e as si opozitar, por e ka përdorur atë si mburojë për interesat e tij dhe demokratët e thjeshtë si mish për top. Në situatën dhe pozitat që ndodhet ai, ku gjysma e Evropës dhe SHBA i ka mbyllur dyert, ky vendim vulos fundin e tij. Sot që flasim “Foltoren” nuk e njeh asnjë institucion. Nga ana tjetër, Berisha të vetmen rrugë tani ka që të “falet” tek Ilir Meta. Por kreu i Partisë së Lirisë ia ka mbyllur përfundimisht derën.
Mësohet se më 2 mars, Partia e çiftit Meta-Kryemadhi është regjistruar në Komisionin Qendror të Zgjedhjeve. “Në respekt të Nenit 64 e në vijim të Kodit Zgjedhor të Republikës së Shqipërisë, Partia e Lirisë është regjistruar në Komisionin Qendror të Zgjedhjeve, si subjekt zgjedhor për zgjedhjet për njësitë e qeverisjes vendore, të datës 14 Maj”, thuhet në njoftimin e Partisë së Lirisë. Pra Meta nuk do të ndjekë linjën e 6 marsit të vitit 2022 ku shkoi në zgjedhje me Berishën. Gjithashtu dhe Berisha e përjashtoi një koalicion me Ilir Metën para pak javësh. Megjithëse këta dy politikanë nuk njohin fjalë dhe surprizat nuk mund të përjashtohen.
Berisha do të hiqet me dhunë nga PD
Nga ana tjetër, nëse Berisha bën rezistencë dhe refuzon të largohet nga selia blu do i ketë keq punët. Nisur nga fakti që ligji tani i jep të drejtë Bashës të drejtojë PD-në, mësohet se në lojë do të hyjë Përmbarimi, i cili do të nxjerrë Berishën nga selia blu. Në këtë kontekst, gazeta ka mësuar se pas këtij veprimi dhe në kushtet ku Sali Berisha dhe mbështetësit e tij do të bëjnë rezistencë, mësohet se drejtuesit legjitim të Partisë Demokratike do të pajojnë një polici private për të ruajtur godinën.
Kjo strategji pritet t’i hapë telashe Berishës, pasi ai dhe mbështetësit e tij nuk mësyjnë dot në godinën blu, sikundër bënë më 8 janar të vitit të kaluar, pasi policia private nuk pret urdhra nga Basha apo Alibeajn dhe se ligji i jep të drejtë asaj që të thërrasë në ndihmë Policinë e Shtetit, për të shtypur revoltat apo dhunën që mund të aplikohet nga ithtarët e Berishës. /NGA ELMAS BOGDANI
