Teksa qarkullon lajmi se Prokuroria e Tiranës ka zbuluar skandalin e abuzimit me tenderat në Ministrinë e Drejtësisë dhe se për këtë janë arrestuar 4 zyrtarë e po verifikohen edhe dy ish-ministra të këtij dikasteri, ka ardhur një reagim nga ana e Ylli Manjanit.
Ish-ministri i Drejtësisë, teksa bën me dije se nuk është në dijeni të hapave të ndërmarra nga ana e prokurorisë, shkruan në një postim se nuk e ka problem verifikimin e shërbimeve mbështetëse të ministrisë. Ai shprehet më tej se nuk ka ndërmend t’i nënshtrohet gjyqeve popullore dhe elektronike e aq më tepër për “gjëra të stisura”. Duke e cilësuar lajmin e sotëm si tentativa për të ndotur figurën e tij, Manjani thekson se do të vijojë të mendojë e shprehet lirshëm.
Mirmëngjes! Sapo u zgjova u njoha me lajme “bombastike” mbi disa arrestime zyrtarësh. Mendova për një çast se kush e di çka ndodhur me çështjen e unazës së re apo ndonjë koncension apo blerje votash…. Por jo! Ishin arrestuar disa zyrtarë dhe ish zyrtarë të Ministrisë së Drejtësisë. Ende nuk kuptoj nëse janë arrestuar, pra me vendim gjykate, apo shoqëruar e ndaluar nga policia. Nuk më erdhi mirë sigurisht! Janë punonjës të asaj Ministrie dhe për aq kohë sa kam punuar me ta, ndjej keqardhje.Në disa lajme elektronike lexova se qenkam dhe unë bashkë me Petrit Vasilin në verifikim!!!
Une nuk di asgjë për këtë fakt, por nëse duan të verifikojnë apo hetojnë shumë mirë do bëjnë. Nëse ky pushtet ka mbaruar punë me trafikun e drogës, kanabizimin e vendit, koncensionet e PPP, tenderat e infrastrukturës dhe abuzimet miliona e eurove, le t’i verifikojnë edhe shërbimet mbështetëse të Ministrisë së Drejtësisë. Biles edhe të kohës së sotme, se i njëjti personel është…Unë nuk jam person me imunitet dhe as mbrohem nga parti apo njeri tjetër. Mendoj dhe shprehem lirisht për atë që mendoj, pavarësisht çmendojnë të tjerët.
Për të gjithë të interesuarit, miq e gazetarë nuk kam asnjë koment më shumë për këtë çështje. Nuk kam ndërmend të bëj e as t’i nënshtrohem gjyqeve popullore dhe elektronike. Aq më tepër për gjera të stisura…Portaleve e mediave pro qeverisë, aq më pak lodhem t’i sqaroj e t’u jap ushqim që ata të vijojnë të vjellin kundër meje. Vijoj të mendoj e shprehem lirisht mbi ato që mendoj, pa i marrë leje askujt! Si gjithmonë!
Ditën e sotme u bë e ditur se Prokuroria e Tiranës ka zbuluar abuzime dhe shkelje përgjatë dy viteve, konkretisht në 2016-2017, me 5 tendera duke shkaktuar një dëm të llogaritur në miliona euro duke përfshirë dhe atë të byzylykve elektonik për të dënuarit me arrest shtëpie.
