Përveç Artur Meçollarit, disa media pranë opozitës kanë nisur akuzat edhe ndaj një nga kryenegociatorët e palës shqiptare, Armand Skapi.
Kjo, pasi ai ka bërë një specializim në Greqi.
Bazuar mbi këtë fakt, aludohet se ai mund t’i shërbejë Greqisë.
“Partia Demokratike, ish-zyrtarë të shërbimeve inteligjente dhe mediat kanë ngritur alarmin dje për dy prej emrave që janë zgjedhur në ekip nga ministri Ditmir Bushati. Akuzat janë për bashkëkryetarin e delegacionit, Armand Skapi dhe për përfaqësuesin e ministrisë së Mbrotjes, Artur Meçollari.
Armand Skapi është drejtor i Drejtorisë së Traktateve dhe të Drejtës Ndërkombëtare në Ministrinë e Jashtme dhe një nga profesionistët më të kualifikuar të këtij institucioni. Por te kualifikimet e tij qëndron edhe problemi që ka hapur debat.
Sipas jetëshkrimit në faqen online të Ministrisë së Jashtme, Skapi ka kryer një trajnim për të Drejtën Ndërkombëtare të Detit në Rodos të Greqisë. Praktikisht leksionet për ndarjen e detit me Greqinë bashkëkryetari i grupit të negociatorëve shqiptarë e ka kryer pikërisht në Greqi.
Një fakt i tillë nuk është automatikisht penalizues për negociatorin shqiptar, por gjithësi ngre ndryshime të arsyeshme për kriteret e përzgjedhjes së emrave. Çfarëdo vendimesh që të marrë drejtori i zgjedhur nga ministri Bushati do të paragjykohet dhe kjo nuk u shërben negociatave dhe qëndrimit të palës shqiptare”, shkruan një gazetë e afërt me Ilir Metën.
“Imagjinoni sikur në palën greke të dilte ndonjë ekspert grek i specializuar në Shqipëri. Do ta digjnin të gjallë nëse futej në delegacion. Ndërsa ne nuk po themi “djegie”, por së paku të kenë integritet publik dhe të mos kontenstohen, pasi çdo element i marrëveshjes me vonë do shikohet me dyshim.
Gjithsesi do jetë Presidenti i Republikës që do ta gjykojë listen”, vijon më tej shkrimi.
Me këtë logjikë, i bie që edhe Meta është i “kapur” nga Greqia.
Se ndryshe nga Skapi, që thjesht ka bërë një specializim në Greqi, Ilir Meta është i vetmi politikan shqiptar që është nderuar nga Greqia me “Kryqin e Artë”, dekorata më e lartë e këtij vendi.
Medalja në fjalë nuk i jepet çdokujt nga Parlamenti i Greqisë, por personazheve që ata i shohin pranë kauzave të tyre.
Ndaj, kur duan ta shesin Metën si “heroin” që mund të na shpëtojë nga gjëma që mund të na bëjnë këta negociatroët për marrëveshjen e re me Greqinë, ndoshta do të bënin mirë të mos e harronin këtë fakt!/TemA
