Në mbledhjen e kryetarit Lulzim Basha me deputetët dhe kandidatët jo fitues të Partisë Demokratike, Mark Marku ka kërkuar nisjen e protestave. Sipas tij duhet të lihen mënjanë procedurat dhe të nisin protestat, duke theksuar se ka ardhur koha që të tregojnë si mbrohet vota.
“Duhet të lemë procedurat, ka ardhur koha të tregojmë si e mbrojmë ne votën. Duhet të nisim protestat popullore,” ka thënë Marku.
“PD po punon fort për të gjithë dokumentacionin për masakrën zgjedhore. Të gjithë e dinë që këtu ka patur një masakër zgjedhore, por duhen provat juridike për ta provuar këtë.
Pastaj do jenë të gjitha format e tjera, protesta, luftën do ta bëjmë në parlament, në rrugë. Në gjykimin tim duhet të jetë një luftë deri sa Rama dhe bandat të largohen nga pushteti.
Duhet të kombinohen të gjitha format e rezistencës. Bëhet fjalë për një regjim që duhet luftuar me të gjitha format. Ky është gjykimi im personal: Aty ku nuk ka zgjedhje të lira u lind e derejta qytetarëve të reagojnë me të gjitha format.
Kryetari i Partisë e ka deklaruar që nuk do ta njohë rezultatin. Zërat për dorëheqjen e Bashës i konsideroj si shërbyes të Ramës, ata mund ta bëjnë me dashje apo pa dashje”, ka thënë Marku.
Kjo kërkesë e tij është mbështetur nga Agron Gjekmarkaj.
Burime nga mbledhja me dyer të mbyllura bëjnë me dije për gazetarin Juxhin Mustafaraj të ABC News, se kryedemokrati ka pohuar se në shtator do të jenë në Parlament. “Betejën në shtator do ta vazhdojmë në Parlament,” ka thënë Basha.
Mbledhja në selinë blu ka zgjatur më shumë se një orë. Ky takim duket se ishte orientues, ku Basha i ka udhëzuar demokratët sesi duhet të vijonë. Kryedemokrati ka kërkuar prej tyre që të vijojnë punën me të njëjtin ritëm për të mbledhur prova në mënyrë që të faktojnë masakrën zgjedhore.
