Gazetari Frrok Çupi në një intervistë të dhënë sëfundmi për emisionin ‘Spotlight’ ka rrëfyer në të tjera edhe një ndër përplasjet më të forta me ish-kryeministrin Sali Berisha në një moment deçiziv për fatin e kombit shqiptar. Ai rrëfen sesi e kanë kërcënuar edhe me thika para redaksisë ku ai punonte.
“Më 19 shkurt nuk dilte gazeta atë ditë, deklarate e datës 18 është bërë tek Zëri i Popullit, dhe më datën 21 kur ka rënë monumenti është mbledhur kryesia e partisë tek rruga e Kavajës dhe kanë vendosur që gazeta RD të nesërmen të dalë si Zëri i Popullit dhe t’i kërkojmë ndjesë Partisë së Punës, shokut Ramiz Alia pse kemi rrëzuar monumentin.
Kjo ka qenë e gjitha, sigurisht që anëtarët e tjerë si Shahin Kadare, Gramos Pashko kanë qeshur me Saliun, por çfarë t’i bënin. Vetëm thanë shiko ne kemi punë e gazetës, ju lutem thanë, thuajini Frrokjut që ta bëjë gazetën njësoj si Zëri i Popullit, të jetë i njëjti tekst.
Në atë kohë më kanë ardhur anëtarët e bordit dhe më kanë thënë të lutem Frrok bëje se nuk merresh vesh me atë. Si të bëj unë gazetën si Zëri i Popullit, çfarë do të thotë kjo?!
Ka qenë ora 8 e mbrëmjes, në atë kohë kishin dalë njerëzit shumë të tronditur, disa arrestoheshin, tek dyert e gazetës kishin ardhur këta që kishin rrëzuar monumentin dhe thonin tani na strehoni sepse askush nuk i mbronte.
Na mbroni sepse ne tani po na arrestojnë. Në orën 11 të natës mua më kanë dalë me thuka aty para redaksisë së gazetës. Dhe në atë kohë kam mbledhur gjithë gazetarët dhe iu kam thënën, keni shkrime shumë të forta kundër komunizmit dhe ata u çuditën.
Në atë natë unë për të dalë gazeta më e fortë, jam ulur vet dhe kam shkruar atë shkrimin e famshëm që mbahet mend ‘A mund ta kalojmë duke qeshur’. Se duhej të qeshje të nesërmen që të shkarkoje tensionet”, tregon Frrok Çupi.
