Pas 11 vitesh në pushtet, kryeministri Edi Rama vendosi që të shpërbëjë grupin “Çiftelia”, i cili po zinte rrënjë prej shumë vitesh. Dje u largua përfundimisht drejtori i Policisë së Shtetit Muhamet Rrumbullaku dhe Tonin Vocaj, drejtues i qarkut të Tiranës, të dy pjesë e grupit “Çiftelia. Po cila është historia e këtij grupi? Në media filloi të qarkullonte një foto e bërë në një nga lokalet më luksoze në Dajt, ku po drekonin 3 zyrtarë të policisë së shtetit, madje duke i rënë me radhë çiftelisë, veglës muzikore të trevës së veriut nga e kishin dhe origjinën këta drejtues. Ata ishin Agron Kuliçi, ish-kreu i bodigardëve të Sali Berishës, në atë kohë nëndrejtori i përgjithshëm i Policisë së Shtetit, Tonin Vocaj, si dhe Nikolin Bala, Drejtor i Forcës Operacionale në Policinë e Shtetit.
Nën shoqërinë e tyre, madje “shpirti” i tryezës ishte as më pak dhe as më shumë po pikërisht Arben Frroku, njeriu që më vonë u akuzua për vrasjen e kryekomisar Dritan Lamajt. Ishin të mbledhur si me “dorë” krerët më të lartë të policisë së shtetit, lidhja e të cilëve kishte vetëm një emër që i mbante të bashkuar: Kryeministri i atëhershëm Sali Berisha. Grupi “çiftelia” që drekonte me Arben Frrokun në lokalin në Dajt kanë qenë njerëzit më të besuar të Berishës dhe akuzohen se me urdhër dhe në emër të tij kanë zbatuar urdhra të errëta të Berishës. Madje edhe në qeverinë “Rama”. Agron Kuliçi vazhdonte të jepte direktivat e Sali Berishës dhe Tonin Vocaj e Rrumbullaku i kanë zbatuar me sukses, duke nisur që nga protestat që ka organizuar Sali Berisha, deri te këto të fundit para Bashkisë së Tiranës, ku Berisha diktonte dhe formacionet se si duhet të vendosej Policia e Shtetit në momentin e protestave.
Edi Rama shpërbën grupin “Çiftelia”
Dikur opozitë, sot mazhorancë, PS akuzonte shpesh grupin “Çiftelia” pasi fotoja e shkrepur në Dajt ku ata kishin pozuar me çifteli shkaktoi në atë kohë një debat të ashpër politik. Rama i gëlltiti ato akuza në 2022, që kur emëroi Rrumbullakun në krye të policisë së Shtetit. Ai u pyet në lidhje me “ Grupin Çiftelia”, ku tha: “Nuk jemi një regjim patronazhistësh siç thuhet dhe me këtë rast i përshëndes patronazhistët kudo ku janë se janë zemra e pazëvendësueshme e Partisë Socialiste, por jemi një qeveri e cila vlerëson meritën. Kështu që ato çiftelitë dhe ato daullet e risjella 10 vjet më mbrapa në skenë për arsye që unë i di, por që nuk ka rëndësi fare t’i harxhojmë kohë publikut këtu pse dhe nga kush dhe si, nuk kanë asnjë vlerë. Muhamet Rrumbullaku është një vlerë morale, me një integritet të padiskutueshëm deri tani nga askush, të paktën deri tani sa i përket aspektit të ndershmërisë profesionale”, deklaroi Rama. Por sot ky grup mori fund. Ramës iu deshën 11 vite pushtet që të largonte “fytyra të vjetra” që vetë ai i akuzuar si të lidhur me politikën dhe krimin.
