Ish-kryeministri, Sali Berisha duket se e ka gjetur personin që mund ta shpëtojë nga ndëshkimi amerikan. SHBA e ka shpallur të padëshiruar dhe ambasadorja Kim ka bërë të qartë se nuk ka asnjë kthim pas, duke refuzuar kërkesat për pazare.
Megjithatë duket se njerëzit që i rrinë pas Berishës kanë vendosur të fusin në valle Richard Grennell. Ky i fundit ishte i dërguari i Trump për Ballkanin, por që tani nuk ka më asnjë rol. Ai në verë erdhi në Tiranë dhe pati takime me presidentin Meta, ndërsa u strehua nga një biznesmen pranë presidentit.
Por dje ai ka ardhur sërish në Tiranë dhe më të entuziazmuarit kanë qenë njerëzit pranë Berishës. Media pranë tij kanë bërë një sërë artikujsh për ardhjen e tij dhe kanë paralajmëruar takime. Dyshimet janë se ai ka ardhur me ndërhyrjen e aktivistes Evi Kokalari dhe pritet t’i dalë në mbështetje Berishës.
Madje ka media që thonë se ai do të shkojë dhe në foltore, por mbetet të shihet. Duhet theksuar se në verë, kur Grenell vizitoi Tiranën, pati takime dhe në Beograd. “Zëri i Amerikës” në atë kohë bëri një artikull ku ngrinte shumë dyshime për vizitën e tij. “Ish i dërguari amerikan për Kosovën postoi në Instagram një video nga një festë në një klub nate në Beograd me ministren serbe të Financave Sinisa Mali.
Ai gjithashtu postoi në Instagram fotografi me Presidentin shqiptar Ilir Meta dhe Kryeministrin Edi Rama, dhe më pas postoi fotografi nga bregdeti shqiptar, me pak detaje se çfarë po bënte në Shqipëri. Zëri i Amerikës u përpoq ta kontaktonte përmes ish bashkëpunëtorëve të administratës, të cilët thanë se nuk kishte informacion se ku punon tani dh nuk kishin as kontaktin e tij.
Instituti për Politikë dhe Studime Strategjike i Universitetit Carnegie Mellon u përgjigj se Grenell nuk punon më atje, megjithëse në faqen e internetit të organizatës së tij “Fix California” thuhet se punon aty, të cilën ai e themeloi kur u spekulua se ai do të kandidonte për guvernator të Kalifornisë”, shkruante “VOA” në atë kohë.
