Padia e ish-kryeministrit Sali Berisha ndaj Sekretarit Amerikan të Shtetit, Antony Blinken ka bërë jehonë në mediat ruse e serbe. Që kur Berisha nisi luftë me amerikanët, po gjen mbështetje të madhe në mediat ruse, të cilat i japin hapësirë çdo lloj sulmi e akuze të tij ndaj amerikanëve.
E njëjta gjë ka ndodhur edhe së fundmi. Javën që lamë pas, Berisha njoftoi se ka dorëzuar në Paris padinë ndaj Blinken. Shumë media ruse e serbe i kanë bërë jehonë kësaj pjese.
“Ish-presidenti dhe ish-kryeministri i Shqipërisë Sali Berisha ngriti një padi për shpifjeje kundër Sekretarit të Shtetit Anthony Blinken, në një gjykatë të Parisit. Berisha tha se shpifja nuk mund t’i nënshtrohet imunitetit dhe se duhet të dënohet në çdo vend. Ai deklaroi se Blinken duhet të dorëzojë të gjitha provat që ka kundër tij.
Në maj të vitit 2021, Blinken njoftoi se Berisha dhe familja e tij u shpallën “non grata” nga SHBA për shkak të përfshirjes në korrupsion. Ndërkohë në fillim të qershorit, presidentit Biden nënshkroi një dekret për sanksione ndaj individëve dhe organizatave që kërcënojnë paqen dhe stabilitetin në Ballkan”, shkruan një portal rus. Edhe disa portale të tjera janë në të njëjtën linjë.
Ndërkohë ka dhe nga ato portale që marrin shumë fort në mbrojtje Berishën. Sa i takon portaleve serbe, fokusi i tyre ka qenë dhe përgjigja që ambasada amerikane i dha Berishës, ku paralajmëroi se do ndëshkohet çdo i korruptuar. “Sipas politikanit shqiptar, “dora e George Soros dhe kryeministrit aktual të Shqipërisë Edi Rama është e dukshme pas akuzave të rreme kundër tij”.
“Për hir të transparencës, i bëj thirrje Sekretarit të Shtetit Blinken të paraqesë në gjykatë të gjitha provat që ai ka kundër meje dhe familjes sime”, tha Berisha në një konferencë shtypi të thirrur në lidhje me ngritjen e një padie kundër Blinken”, shkruan televizioni serb, “N1”. Po ashtu pasqyrim ka pasur dhe në shumë media të tjera, duke ecur në të njëjtën linjë si mediat e mësipërme.
Mbështetja e medieve ruse
Pak ditë më parë gazeta raportoi se si mediat ruse i dolën në krah Berishës edhe sa i takon nismës “Ballkani i Hapur”. Shumë individë kanë dalë kundër kësaj nisme dhe ndër më aktivët ka qenë ish-kryeministri Sali Berisha. Ky i fundit ka akuzuar Ramën se përmes kësaj lëvizje po krijon Jugosllavinë e Madhe. Por qëndrimet e tij duket se kanë gjetur mbështetje nga mediat ruse.
“Deputeti i Partisë Demokratike të Shqipërisë, presidenti i parë i shqiptarëve, Sali Berisha, i cili u shpall person “non grata” në Shtetet e Bashkuara për përfshirje në skema korrupsioni, komentoi takimin e Kryeministrave të Shqipërisë dhe Maqedonisë së Veriut me Presidentin e Serbisë më 28 korrik në kuadër të projektit për krijimin e “mini-Shengenit” ballkanik.
Politikani shqiptar përmes një lidhjes video u tha gazetarëve në programin televiziv “Debat Plus” se kjo “aleancë trepalëshe” nuk i shërben paqes në Ballkan, por i jep jetë të re fantazive të vjetra politike”, shkruan portali “Regnum”. Që pas shpalljes “non grata” dhe nisjes së përplasjeve me amerikanët, mediat ruse raportojnë shpesh qëndrimet e ish-kryeministrit.
