Dëgjova Fredi Belerin në Athinë, në një takim me mbështetës të Berishës, ku ai u kërkoi falje atyre për gabimet që kishte bërë PD, por i siguroi se ajo është e bashkuar dhe do të ecë përpara.
Nuk e kisha idenë që Fredi Beleri ka qenë anëtar i PD apo njeri i brendshëm i saj. Për një kohë të gjatë, ai është hequr si viktimë e saj.
Dhe kjo është e vetmja arsye për të cilën ai ka të drejtë të kërkojë që PD të kërkojë falje.
Për shembull, Berisha mund të dalë në një intervistë si ato ku shfaqen të penduarit tek Çim Peka dhe të thotë:
“PD ka bërë një gabim të rëndë më 10 Prill 1994. Në një postë kufitare në jug të vendit, afër Libohovës, disa paramilitarë me uniformë të ushtrisë greke sulmuan postën tonë kufitare dhe vranë oficerin Fatmir Hoxha dhe ushtarin Arsen Gjini.
Ne, si parti, u nxituam dhe bëmë disa gabime të rënda.
Gabimi i parë ishte që akuzuam Greqinë se na provokoi, kur dihet botërisht që Greqia nuk kishte gisht fare në atë sulm. Sulmi u mor përsipër nga disa të rinj militantë të një organizate që lufton për lirinë e ‘Vorioepirit’.
Më pas doli që policia greke arrestoi Fredi Belerin dhe ata të rinj të tjerë me armë automatike dhe municione, të cilat ishin përdorur edhe në atë ngjarje.
Ne i shpallëm ata armiq të Shqipërisë dhe u nxituam. Edhe pse u dënuan në shkallën e parë, ata më pas në vitin 1999, në një gjyq të mbyllur në një kishë në Athinë, çështja u mbyll për arsye të sigurisë kombëtare të Greqisë.
Kjo tregoi se ne u nxituam dhe për pak rrezikuam sigurinë kombëtare të Greqisë.
Prej atëherë, ne kemi bërë gabim pas gabimi, duke e quajtur Fredi Belerin vrasës të ushtarëve shqiptarë.
Sot ka ardhur dita e të vërtetës dhe unë po ju them juve se Fredi Beleri jo vetëm që nuk është vrasës i ushtarëve shqiptarë, por ai po mbron me heroizëm si askush tjetër PD-në dhe të ardhmen e demokracisë, pa të cilat Shqipëria nuk mund të ekzistojë. Ndaj, i kërkoj falje atij.”
Një deklaratë e tillë, pak a shumë në këtë frymë, mund të justifikonte deklaratën e sotme të Belerit. Kështu, të gjitha palët janë të qeta: Beleri është i qetë që PD ka kërkuar falje për gabimet e saj dhe që ai është i pastër, ndërsa vetë PD e kalon këtë kompleksin e gabimit që ka bërë ndaj Belerit.
Në fund të fundit, ata dy të vrarët ishin dy ish-komunistë nga Jugu.
E vetmja gjë që nuk shkon është fakti që Beleri kërkon që këtë falje në emër të PD ta bëjë vetë Beleri. Pra, të kërkojë falje në emër të PD që PD e ka quajtur atë terrorist dhe ka kërkuar burgimin e tij.
Këtu e ka tepëruar pak, por fushatë është dhe lejohet. E rëndësishme është që tani Berisha dhe Beleri janë të bashkuar, dhe kjo nënkupton që PD nuk është më e përçarë. Rreth Belerit! Ata që janë kundër tij, i kanë zbuar.
