Të mos ndalemi pastaj te shpenzimet e luksit të Monës, së cilës vetëm bizhuteritë mund t’i kushtojnë mijëra euro
Monika Kryemadhi ka vijuar edhe ditën e sotme të ‘qajë me lot krokodili’ për varfërinë e shqiptarëve. Kryetarja e LSI zhvilloi një takim me të rinjtë e LRI në Selenicë, prej ku iu bëri thirrje gjithë të rinjve të përfshihen sa më shumë në politikë. Kryemadhi premtoi se LSI do t’i demaskojë ‘mashtrimet e Rilindjes’, duke harruar se në fakt demaskimi duhet të nisë nga partia e saj, e cila ka vjedhur më shumë gjatë këtyre viteve në pushtet.
Ajo foli para të rinjve për varfërinë ekstreme, që është ulur këmbëkryq në shtëpitë e shqiptarëve, duke u shprehur se i gjithë populli punon për 10 veta. Në fakt, në këtë listë prej 10 vetash është padyshim edhe Mona, së bashku me bashkëshortin e saj, Presidentin Ilir Meta, të cilët kanë një pasuri në shifra të çmendura.
“Ky është paradoksi që ndodh në Shqipëri, ku një popull i tërë punon për 10 veta dhe punon për një njeri, se këta 10 vetë çojnë paratë në xhepin e një njeriu. Ne nuk mund të ngelemi më peng i mashtrimeve, por mbi të gjitha ne duhet të rrëzojmë këtë klikë, e cila po varfëron çdo ditë e më shumë shqiptarët, ta rrëzojmë këtë klikë, e cila çdo ditë dhe më shumë po bën shqiptarët më të lodhur, po i bën shqiptarët më të dobët, po i bën shqiptarët më me pa besim në vetvete”, tha ndër të tjera Kryemadhi.
Por, teksa ajo fliste për këtë klikë që ka pushtuar gjithë vendin dhe po i merr edhe frymën e fundit, padyshim që mendja e shumë të rinjve shkon te fëmijët e Monës, të cilët po shkollohen në universitetet më të shtrenjta të botës dhe po bëjnë një jetë luksi. E si mundet të besohet Mona, kur flet për varfërinë dhe guxon t’i shohë shqiptarët në sy, kur paguan miliona euro për fëmijët e saj, që po shkollohen në Londër.
Sipas llogarive të thjeshta, ka rezultuar se vetëm për vitin 2017 çifti Meta-Kryemadhi kanë shpenzuar 140 mijë paund ose 160 mijë euro për fëmijët. Le të mos ndalemi pastaj te shpenzimet e luksit të Monës, së cilës vetëm bizhuteritë mund t’i kushtojnë mijëra euro. Për të gjitha këto shpenzime dhe jetë përrallore që bën Mona me bashkëshortin dhe fëmijët, ajo nuk mund t’iu dalë para shqiptarëve dhe aq më tepër t’iu flasë për varfërinë.
