I dërguari i Shteteve të Bashkuara për Ballkanin Perëndimor, Gabriel Escobar, në një konferencë online me gazetarë nga rajoni dhe Evropa, ka deklaruar dje se krijimi i Asociacionit me Shumicë Serbe në Kosovë, është detyrim dhe duhet të zbatohet.
Më pas ai vijoi se ky detyrim do të përmbushet me apo pa kryeministrin Albin Kurti, ndërsa shtoi se për të nuk ka ndonjë afat kohor. “E kam thënë që marrëveshja nuk është njohje reciproke por është për të normalizuar marrëdhëniet mes Kosovës dhe Serbisë. Pozicioni ynë është që të formohet Asosacioni.
Marrëveshja duhet implementuar, është detyrim, ne kemi besim se do të implementohet. Me apo pa Albin Kurtin Asociacioni do të krijohet. Mendoj se mes palëve ka seriozitet. Kur flasim për themelimin e Asosacionit të Komunave serbe, nuk do të thotë që do të ndikojë tek Kushtetuta e Kosovës, nuk ka asgjë të frikshme këtu ”, tha Escobar. Kosova dhe Serbia, në kuadër të dialogut të Brukselit, kanë arritur dy marrëveshje për Asociacionin, më 2013 dhe 2015.
Por, Gjykata Kushtetuese ka gjetur se marrëveshja e fundit nuk është në harmoni të plotë me Kushtetutën. Serbia insiston në themelimin e Asociacionit, por Qeveria e Kosovës e kundërshton një asociacionin një etnik, që thotë se do të mund të krijonte një nivel të ri të pushtetit.
Kryeministri i Kosovës, Albin Kurti dhe presidenti i Serbisë, Aleksandër Vuçiç u pajtuan të hënën me propozimin e Bashkimit Evropian për normalizimin e marrëdhënieve. Sipas shefit të diplomacisë evropiane, Josep Borrell, të dy udhëheqësit treguan sjellje të përgjegjshme dhe gatishmëri për të gjetur zgjidhje.
