Reforma në drejtësi pritet që të shndërrohet në makth për ministrat, deputetët dhe drejtorët e lartë të Partisë Socialiste.
Sinjalin e ka dhënë vetë kryeministri Edi Rama, i cili paralajmëroi furtunë arrestimesh në radhët e mazhorancës socialiste. Të shtunën u mbajt në stadiumin “Air Albania” Kongresi i PS, ku kryeministri Rama ka prezantuar disa nga pikat kryesore të mandatit të tretë qeverisës, ndërsa ka lëshuar edhe një sërë mesazh të forta.
Prerë dhe qartë, shefi i qeverisë u shpreh se asnjë socialist që shkel ligjin nuk do të ketë si mburojë Partinë Socialiste, qofshin këta ministra apo deputetë, nëse sipas tij, drejtësia do të kërkojë llogari prej tyre. Madje, zoti Rama siguroi qytetarët se PS e drejtuar prej tij, do të inkurajojë organet e drejtësisë që t’iu kërkojë llogari shkelësve të ligjit.
“Mandati i tretë përputhet në kohë me një kohë të re të drejtësisë në Shqipëri dhe flamuri i PS nuk mund e nuk do të bëhet dot mbulesë për asnjë ministër, për asnjë deputet, për asnjë drejtor, për asnjë shef, nëse drejtësia e re do të kërkojë hesap prej tij apo prej saj. E kam thënë dhe më parë sepse e kemi parë që na është dashur të ndeshemi me këtë sfidë dhe po e përsëris edhe sot.
Partia nuk mban përgjegjësi për askënd që shkel në dërrasën e kalbur të paligjshmërisë, por mban përgjegjësi për se si reagon ndaj kujt shpallet nga drejtësia si i kërkuar për shkelje dhe reagimi ynë do të jetë edhe më i qartë dhe më i prerë, “ik sqarohu përpara drejtësisë me avokatin tënd”, sepse PS nuk është zyrë avokatie e asnjërit nga ne, por është nismëtarja, është garantja, është mbështetësja e reformës në drejtësi, e institucioneve të reja të drejtësisë dhe është prijësja e luftës për barazinë të gjithëve para ligjit”, deklaroi ai.
Reforma në drejtësi, do godasë majtas dhe djathtas
Por nuk ndalet me kaq, pasi kryeministri Edi Rama zbuloi se reforma në drejtësi do të godasë majtas dhe djathtas. Gjatë fjalës së tij në Kongresin e PS, kryeministri Rama theksoi se kushdo që fut duart në xhepat e qytetarëve dhe abuzon me detyrën që i është ngarkuar, sipas tij, do të jetë subjekt i reformës në drejtësi dhe organeve të dalë prej saj. “Reforma në drejtësi dhe lufta kundër drejtësisë së vjetër dhe tutorëve të saj është një vijë e kuqe ndarëse jo vetëm mes nesh dhe armiqve të reformës në drejtësi, por mes edhe Partisë Socialiste dhe kujtdo brenda nesh që hyn në gjynah me popullin e me shtetin shqiptar, duke abuzuar me detyrën për përfitime të paligjshme”, u shpreh ai.
Parazitët në administratë nuk i mbron PS
Më tej gjatë fjalës së tij, kryeministri Edi Rama paralajmëroi edhe reformë të thellë në administratën shtetërore. Sipas tij, të korruptuarit dhe arrogantët nuk do kenë vend në administratë. “Ne duhet të shtyjmë shumë më fort përpara, të gjithë së bashku, duke mbështetur pa rezervë e pa kundërshti, çlirimin e mëtejshëm të sektorit publik, nga parazitë, nga arrogantë, nga injorantë, me mbulesa politike, të falur nga njëri apo nga tjetri, në emrin e PS-së gjithmonë, të cilat mbulesa e bëjnë flamurin e PS të duket si leckat e gabit, qytetarëve që përballen me këtë lloj specie, fatkeqësisht larg të qenit një specie në zhdukje zyrtarësh e nëpunësish”, nënvizoi kryeministri Edi Rama.
