Anëtari i Kryesisë së PD, Ronald Bejko kritikoi ish-kryetarin e PD Lulzim Basha për apatinë, mungesën e vullnetit për të realizuar misionet politike, etj, të cilat sipas tij kushtëzuan rënien dhe dorëheqjen nga lidershipi demokrat.
Në një studio televizive, ish-bashkëpunëtori i Bashës theksoi se ky i fundit nuk komunikonte mirë me personat që bashkëpunonte si dhe krijoi shumë kundërshtarë duke i dhënë mundësinë ish-liderit historik demokrat që të rimerrte partinë.
“ (Basha) është apatik dhe nuk i çon të gjitha deri në fund, kishte probleme me komunikimin me bashkëpunëtorët e vet, krijoi kundërshtarë.
Basha me paaftësinë për të menaxhuar situatën i krijoi të gjitha hapësirat Berishës që të merrte partinë”, tha Bejko. Më tej, Sekretari për Çështjet Vendore në PD akuzoi ish-kryeministrin dhe presidentin aktual Ilir Meta për mungesë të moralit politik. Bejko kujtoi akuzat e rënda të Berishës ndaj Metës në fillim të viteve 2000 si dhe pajtimin dhe “bashkëjetesën politike”.
Lidhur me rikthimin e Berishës në PD, Bejko theksoi se kreu i shtetit e ndihmoi ish-liderin historik të PD në luftën politike ndaj Bashës duke i hedhur një kamerdare. Sipas tij, Meta ndryshoi fatin e politikës në Shqipëri me bashkëpunimin me Berishën.
“E ka bërë me Ilir Metën që i ka thënë ke vjedhur florinj shqiptarë, e ka akuzuar për tregti droge, për një vrasje në Tropojë dhe në fund janë përqafuar. Meta e futi prapë në lojë Berishën. Pjesë e lojës për ta kthyer në krye, për t’i dhënë një as tjetër, e nxori asin nën mëngë.
I hodhi një kamerdare shpëtimi. Jo vetëm që e shpëtoi, por ndryshoi edhe fatin e politikës shqiptare”, deklaroi Roland Bejko.
