Ish-kryeministri Sali Berisha dhe Presidenti Ilir Meta, kanë rinisur tentativat për të përdorur për kredo politike konfliktin Kosovë-Serbi. Debati për ndryshimin e kufijve është rihapur me Samitin e Berlinit dhe eksponentë të PD e LSI e kanë shfrytëzuar këtë gjë, duke sulmuar kryeministrin Edi Rama dhe duke nxitur më tej përplasje rajonale. Në Berlin u diskutua mundësia e një marrëveshje mes Kosovës e Serbisë, ndërsa në fokus ka qenë heqja e takës ndaj Beogradit.
Por opozita e ka interpretuar Samitin si një takim që i vuri kapak idesë së ndryshimit të kufijve. Sali Berisha, Monika Kryemadhi dhe përfaqësues të tjerë të PD e LSI janë hedhur në sulm duke deklaruar se Rama dhe Thaçi po bëjnë pazare në kurriz të Kosovës dhe shqiptarëve. Berisha ka qenë më i ashpër, duke thënë madje se duan të shesin Kosovën. Por deklarata të tilla duket se nuk janë pa qëllim, pasi duan të nxisin destabilizim rajonal. Së pari, një gjë e tillë nxit përplasje Kosovë-Shqipëri.
Sinjalet janë dhënë që tani, pasi Rama e Haradinaj janë përplasur në distancë. Haradinaj njihet për mbështetjen që ka nga Meta. Po ashtu, të tilla deklarata përkeqësojnë marrëdhëniet Kosovë-Serbi, Serbi-Shqipëri, por dhe marrëdhëniet mes vendit tonë dhe ndërkombëtarëve. Veçanërisht Gjermanisë, që ka dalë kundër ndryshimit të kufijve. E gjithë kjo është plan i mirëmenduar i dyshes Meta-Berisha, që kanë dalë hapur një pakti Kosovë-Serbi.
Ndërkohë që kryeministri Rama është shprehur se mbështet çdo marrëveshje që ka firmën e SHBA dhe BE. Tentativat për të nxitur përplasje rajonale kanë nisur që me refuzimin e dekretit të Metës për Gent Cakën, pasi argumenti kryesor ishte se ai është pro rishikimit të kufijve.
Por tani PD, LSI, e Berisha janë hedhur në sulm për ta shfrytëzuar këtë rast. Mirëpo të gjitha përplasjet rajonale dhe tensione nuk u shërbejnë shqiptarëve, por atyre që nuk na i duan të mirën. Shumë ekspertë kanë thënë se Rusia i gjurmon konfliktet dhe i shfrytëzon mjaft mirë. kufirit Kosovë-Serbi është kthyer në një betejë ndërkombëtare. SHBA po tenton të marrë në dorë situatën dhe po gjen mënyra që të sheshohen gjithë mosmarrëveshjet.
Gjermania ka dalë kundër ndryshimit të kufijve, ndërsa Rusia ka thënë se kjo është ide amerikane. Por dhe politika shqiptare nuk po rri duarkryq dhe po shfrytëzon gjithçka për të destabilizuar si, vendin ashtu dhe rajonin.
Akuzat
Dje ishte kryetarja e LSI, Monika Kryemadhi, e cila në Konventën e LSI, lëshoi akuza ndaj Ramës, por dhe u dërgoi mesazh ndërkombëtarëve se po bëhen pazare me Kosovën. Deklarata e saj dëshmon qartë qëllimin e opozitës, duke tentuar të nxiten mosmarrëveshje në aspektin ndërkombëtar.
“Dhe meqë jemi te frika e të bërit të precedentit rajonal po ju drejtohem më shumë të huajve sesa shqiptarëve në këtë konventë. Dëmin e parë të këtij regjimi kriminalo-oligarkë që ka instaluar Edi Rama në Shqipëri desh e pësuan vëllezërit tanë në Kosovë. Pikërisht prej këtij regjimi që në themel të tij ka pazare dhe jo transparencën.
Pikërisht se formati i pazareve të oligarkisë dhe krimit e ka të shndërruar në skemë dhe format politik dhe diplomatik. Pikërisht se trëndafilin e Partisë Socialiste e ka zëvendësuar me oturakun e qarqeve antishqiptare”, tha ajo. Pak ditë më parë ishte Sali Berisha, ai i cili sulmi ashpër presidentin e Kosovës dhe kryeministrin Rama se po bëjnë pazare më kufijtë, duke nxitur po ashtu përplasje.
“Nuk ka gjë më tragjike se sa kur shikoj që fushatën për copëtimin e Kosovës e merr një njeri që gjithë Kosova e di që është bir shpirtëror i Stanishiçit. Në këtë kontekst unë i konsideroj ata një rrezik të jashtëzakonshëm kombëtar, me pabesinë e tyre të plotë, sepse askush nuk është kundër marrëveshjes.
Deri në vitin 2013 gjithçka ishte transparente, publike dhe mbështetej. Këta kaluan me ardhjen e Edi Ramës në pushtet, në bisedime sekrete, dhe e trajtuan Kosovën sikur të ishin arat e etërve të tyre”, tha ai. po ashtu dhe emra si petrit Vasili kanë reguar ashpër, duke sulmuar kryeministrin Rama. /Kliti Topalli
