Rikthehen përplasjet, sulmet dhe mosmarrëveshjet brenda kampit opozitar. PD e LSI e mbyllën sesionin parlamentar me mosmarrëveshje mes tyre sa i takon ligjit për magjistratët. Por këto tensione duket se janë shtuar. Treshja Berisha-Meta-Kryemadhi ditët e fundit kanë rritur presionin ndaj Lulzim Bashës sa i takon aksionit opozitar. Presidenti përmes mediave pranë tij ka filluar të sulmojë liderin e PD.
Disa portale që njihen si mbështetëse të Metës dhe LSI, prej disa ditësh po akuzojnë Bashën si një lider jo të efektshëm. Sipas tyre, ai nuk ka ditur të shfrytëzojë situatat dhe nuk po ja del të ngrejë Partinë Demokratike. Ka të tjerë që i japin sinjale se në shtator, kur qeveria të rrëzojë ligjin për teatrin, ai duhet të ngrejë qytetarët për të rrëzuar Ramën.
Nga ana tjetër vetë Berisha në çdo status që bën në rrjetet sociale kërkon që të gjithë të bëhen bashkë për shembjen e qeverisë. Që më herët u bë e ditur se Berisha është duke ngritur një grup të tijin në PD, i cili kërkon mosbindje civile dhe tension. Gazeta e ka deklaruar që më herët se plani i tyre është që në shtator të rikthejnë përplasjet. Por Basha deri më tani ka qëndruar i distancuar ndaj çdo akti dhune dhe kjo ka bërë që LSI dhe njerëzit e Berishës të nisin presionet.
Meta e Berisha po i kërkojnë hapur Bashës që në shtator të ngrejë popullin kundër qeverisë. Gazeta ka mësuar se ata janë bërë sërish bashkë dhe synojnë që në dhjetor të ngrihet një qeveri teknike. Plani i tyre është që gjatë muajve të vjeshtës të ketë protesta, bojkote në Parlament dhe Rama të detyrohet të pranojë një qeveri teknike si për zgjedhjet vendore, ashtu dhe për të realizuar kushtet me qëllim integrimin në BE.
Eksponentë të LSI, të PD dhe media pranë Metës çdo ditë po i dërgojnë mesazhe Bashës se në shtator duhen protesta te forta. Ka dhe nga ata që dyshojnë se kthimi i ligjit për teatrin ishte strategji e Ilir Metës. Mediat pranë tij e cilësojnë si një shans që ai i dha Bashës për të filluar protesta nëse qeveria e miraton sërish.
Paralajmërimet e LSI
Përveç medieve, gazetave e portaleve që njihen si mbështetëse të LSI dhe presidentit, ai që ka dhënë një sinjal të qartë ka qenë vetë kreu i grupit parlamentar të LSI. Në një intervistë televizive, Vasili deklaroi hapur se nëse qeveria e miraton sërish ligjin për teatrin, ata do ngrihen kundër saj. “Në shtator do të kemi një debat në Parlament dhe jashtë tij për çështjen e grabitjes së teatrit. Fatin e Tiranës nuk e zgjidh as ky dhe as tjetri. Ky kryetar do të mbahet mend si kryetar i ditëve të zeza. Në shtator do të zgjidhim pa asnjë kompromis, do të ketë përgjigje të rreptë dhe të egër, që kurrkush, qoftë ky kryeministër i marrosur, apo kryetar bashkie budalla. Do të ketë një barrikadë të kapërcyeshme, do të ketë një qendrës që nuk është parë më parë”, tha Vasili. Mesazhi i deputetit të LSI duket se është shumë i qartë dhe gjithë njerëzit e Metës kanë filluar presionet tani ndaj Lulzim Bashës që dhe PD të ketë një reagim të fortë sa i takon teatrit. Po ashtu Kryemadhi ka filluar të karikojë mbështetësit e vet për trazira. Zgjedhjet vendore janë afërt dhe kjo duket se e ka shqetësuar ndjeshëm kampin opozitar. Në vjeshtë LSI dhe Berisha kërkojnë dhunë, ndërsa sipas burimeve, Basha po teton të gjejë një marrëveshje me Ramën sa i takon reformës në drejtësi dhe asaj zgjedhore. Meta-Berisha nuk duan një pakt të dytë dhe synimi vetëm i tyre është qeveria teknike. / Kliti TOPALLI
