Ilir Meta vijon t’i fryjë zjarrit të konfliktit dhe dhunës, tre ditë para zgjedhjeve parlamentare të 25 prillit. Edhe pse ka zëra se presidenti Meta iu shërben qarqeve ruse, ditën e djeshme ai ka bërë një deklaratë të fortë, ku me vetëdije ose jo u shpreh se është poliagjent.
Teksa ishte duke folur në një konferencë për shtyp nga Presidenca dhe ndërsa po sqaronte videon ku shfaqet i maskuar me kapuç në Gjirin e Lalzit, presidenti Meta theksoi se gjithçka është një shpifje që bëhet ndaj tij. Sipas Metës, kryeministri Edi Rama dhe tabori i tij që e mbështet nuk ka shanse ta përgjojë, pasi ai është një agjent i shumëfishtë dhe e pikas kur gjendet përballë kësisoj situatash të sikletshme.
“Mendova të bëj një konferencë të shpejtë me ju për të dhënë argumente shteruese në lidhje me tensionimin e situatës që ka vetëm një autor, Edvin Kristaq Rama, të tjerët janë instrumente të tij. Presidenti takon kriminelë, subjekte të OFL, etj, spiunë që ka vënë se nuk e di që Presidenti është poliagjent i vjetër. Ramazan Topuzi në video, jemi në lokalin e Llesh Mesitit, djali i të cilit është kryetar i organizatës së PS. Kemi shkuar se pimë kafe në shtator, ecim dhe ndalojmë pimë një kafe.
Pse kemi qenë atë ditë atje, sepse atij djalit disa njerëz që dikur kanë qenë në LSI i kanë thënë jo i ka marrë Ilir Meta tokat dhe unë sqarova. Zoti Ramazan ka bërë padinë në SPAK për këtë çështje sepse ndihet i fyer që e kanë konsideruar kontingjent, sepse është një njeri i forcave ligjzbatuese. Kjo është fytyra e Edi Ramës që mashtron shqiptarët, ndaj nuk ka fytyrë të vijë në asnjë ballafaqim me presidentin”, deklaroi ai.
Ngjela ngre dyshime se u shërben rusëve
Por ndërsa presidenti Ilir Meta ishte duke folur në konferencë për mediat, avokat Spartak Ngjela ka shpërthyer në akuza të forta në adresë të kreut të shtetit. Gjatë një prononcimi për mediat dhe teksa analizoi deklaratat e forta të artikuluara nga goja e presidentit Meta, avokat Ngjela siguroi se kreu i shtetit është një shërbëtor i rusëve, pasi thirrjet për trazira, sipas tij, u shërbejnë vetëm vendeve jomiqësore të Shqipërisë.
Prerë dhe qartë zoti Ngjela theksoi se Meta kërkon kaos nga frika e drejtësisë dhe me vetëdije të plotë, në mënyrë që këtë situatë ta shfrytëzojnë vendet armike të Shqipërisë për qëllimet e tyre. Sipas tij, Rusisë i intereson një Shqipëri në destabilitet dhe se Meta po çon ujë në mullirin e Moskës. “Burimet e mia më informojnë se qarqet ruse dhe vendet jo mike të Shqipërisë janë tejet të interesuar për një Shqipëri jostabël.
Fakti që Ilir Meta po bën thirrje për gjakderdhje dhe kërkon kaos në vend, është një sinjal se ai po ndihmon Rusinë në këtë pikë. Por unë gjithashtu kam një të sigurtë që 8 mijë trupat e NATO që do të kryejnë stërvitej në Shqipëri, nuk do të lejojnë destabilitetin e vendit. Plani i Metës do të dështojë, pasi ne jemi vend anëtar i NATO dhe amerikanët nuk lejojnë destabilizimin e vendit”, deklaroi avokat Ngjela.
Meta shton thirrjet për revolta dhe përmbysje
Megjithatë, nga ana tjetër presidenti Ilir Meta vijonte akuza dhe sulmet në adresë të kryeministrit Edi Rama, madje bënte thirrje për revolta dhe përmbysje. Nga ambientet e stërvitjes së talenteve të reja të futbollit në Vlorë, presidenti i vendit, Ilir Meta ka shtuar dozat e ashpërsisë. Duke “harruar” se ishte me fëmijë jo më shumë se 10 vjeç, Meta ka zbuluar përmes një statusi në rrjetet sociale se iu premtoi atyre shpartallimin e bandave të Rilindjes.
“Në ambientet e stërvitjes së talenteve të reja të futbollit në Vlorë, me të ardhmen premtuese të “Flamurtarit” dhe Ekipit Kombëtar, ku mjeshtërit e vegjël të ekipit “Vlora B” dhe trajneri i tyre i përkushtuar Bardhyl Xhakollari më ftuan për një miqësore. U premtova se pas 25 Prillit, kur rinia vlonjate dhe e të gjithë vendit do shpartallojë thellë ekipin e bandave të “Astirit” dhe horrave të Rilindjes, do rikthehem në fushën e tyre për të luajtur së bashku vetëm për fitoren e Vlorës dhe të Shqipërisë, shkruan presidenti Ilir Meta.
