Partia e Lirisë e drejtuar nga ish-presidenti Ilir Meta dhe “Foltorja” e udhëhequr nga ish-kryeministri Sali Berisha, duket se po shfrytëzojnë për kredo politike, tragjedinë e Himarës dhe protestat e thirrura për këtë ngjarje të rëndë, ku pak ditë më parë humbi jetën një vajzë 7 vjeçare, si pasojë e papërgjeshmërisë së një ish-funksionari policie. Të enjten që shkoi shoqëria civile organizoi një protestë para Ministrisë së Brendshme dhe Kryeministrisë, ndërsa i vendosi ultimatum kryeministrit Edi Rama, që të shkarkojë deri të hënë ministrin e Brendshëm, Bledi Çuçi; ministren e Mjedisit dhe Turizmit, Mirela Kumbaro dhe drejtorin e Përgjithshëm të Policisë së Shtetit, Gledis Nano. Por ky ultimatum për “kokat” e dy ministrave dhe drejtorit të policisë, është i injoruar nga kryeministri Rama, ç’ka ka detyruar shoqërinë civile të dalë sërish sot pasdite në protestë. Në protestën e mbajtur javën që shkoi, u panë shumë politikanë dhe eksponentë të Partisë së Lirisë dhe “Foltores”, teksa rra në sy prania e Ilir Metës dhe Sali Berishës. Mirëpo këtë të fundit, duket se po shfrytëzojnë këtë rast, ku jovetëm që kanë përvetësuar kauzën e shoqërisë civile, por tre ditët e fundit iu kanë bërë thirrje militantëve të partive respektive që t’i bashkohen tubimit të sotëm. Pra, Berisha dhe Meta, përmes kësaj lëvizje, ndonëse në protestën e së enjtes deklaruan se ishin atje si qytetarë dhe jo si politikanë, synojnë ta kapin tubimin dhe kauzën e shoqërisë civile, në mënyrë që ta përdorin politikisht. Vitet e fundit kemi parë që shumë protesta të shoqërisë civile, madje edhe studentëve të kapen nga politika. Dhe mesa duket edhe Meta dhe Berisha po përdorin këtë strategji që një protestë qytetarë, ta kthejnë si “kamxhik” kundër qeverisë. Kështu që edhe Meta dhe Berisha, nuk mbeten pas, pasi ky rast është flagrant dhe i nxjerr ata zbuluar, duke bërë që shumë kauza dhe protesta të “treten si kripa në ujë” dhe zhdukur si mirazh, për shkak se politika ka futur hundët në to.
“Foltorja” dhe Partia e Lirisë koordinohen
Por sinjale që tregojnë se “Foltorja” e drejtuar nga Sali Berisha dhe Partia e Lirisë e drejtuar nga Ilir Meta, do të vijojnë edhe sot protestën në Tiranë, duke e kapur atë, pasi ajo është thirrur nga shoqëria civile, janë dhen edhe dje. Fillimisht ka qenë ish-kryeministri Sali Berisha, i cili përmes një statusi në rrjetet sociale, Berisha u shpreh se nesër, pra sot, në 19:30 do të mblidhen qytetarët para Ministrisë së Brendshme.
Sipas tij, qytetarët kërkojnë shkarkimin e Mirela Kumbaros, Bledi Çuçit dhe Gledis Nanos pas vdekjes së 7-vjeçares Jonada Avdia. “Nesër qytetarët në protestë. Mbështetje të plotë protestës së tyre! Sb”, shkruan Berisha. Por pak minuta pas “kushtrimit” të Sali Berishës, ka ardhur edhe reagimi nga Partia e Lirisë, ish-Lëvizjes Socialiste për Integrim. Sekretari i Ilir Metës,
Tedi Blushi, shkruan se nesër, pra sot, do të jenë të gjithë në shesh për të rrëzuar bandën e hajdutëve që qeveris shqiptarët. ““Argëtohuni” sot me Fake-Qeverinë dhe nesër të gjithë në protestë kundër kësaj bande hajdutësh që kujdeset vetëm për Fake-like dhe folloëersa nga Bangladeshi”, shkruan Blushi. Pra shohim një kodonim të plotë mes “Foltores” dhe Partisë së Lirisë për të kapur kauzën dhe protestën e shoqërisë civile.
Kujtojmë se nën moton “Drejtësi për Jonadën”, qytetarët do të mblidhen sërish në protestë pasditen e kësaj të hënë, pasi e mitura shtatë vjeçare u vra nga një skaf që drejtohej nga komisari i policisë, Arjan Tase, teksa po pushonte me familjen në plazhin i Potamit në Himarë.
Në protestë do të kërkohet dorëheqja e ministrit të Brendshëm, Bledi Çuçi, ministres së Turizmit, Mirela Kumbaro, por edhe Drejtorit të Policisë së Shtetit, Gledis Nano. Ndërkohë për deputetin Luan Baçi, i cili ka folur dje në një media, përgjegjësia nis me kryeministrit Rama, pasi siç thotë ai, kemi të bëjmë me një vrasje shtetërore. Sipas Baçit, qytetarët e kanë humbur besimin te policia pasi më shumë ndihen të dhunuar sesa të mbrojtur.
