Lëkunden pozitat e presidentit Ilir Meta dhe ish-kryeministrit Sali Berisha. Reforma në drejtësi ka hyrë në pikën kulmore të saj dhe shumë çështje që kanë ngjallur debat pritet të rihapen. Një ndër to është dhe ajo e skandalit CEZ. Për këtë aferë janë dy çështje në prokurori, ajo e skandalit me firmosjen e kontratës së qeverisë “Berisha” me CEZ për privatizimin e OSHEE.
Ndërsa tjetra ka të bëjë me skandalin CEZ-DIA mbi borxhet e prapambetura. Por për të dyja këto dosje ka pasur zhvillime ditët e fundit. Sot Gjykata e Tiranës do të mbajë një seancë sa i takon padisë që ka bërë Kuvendi për privatizimin e OSHEE. Të kallëzuar janë ish-kryeministri Berisha, djali i tij dhe disa ish-ministra. Prokuroria ka pushur hetimet për këtë skandal dhe po tentohet që Berisha të dalë i pa lagur, duke i shpëtuar SPAK. Të njëjtën gjë tentoi dhe Adriatik Llalla dy vite më parë. Por sot gjykata do të mblidhet dhe do të vendosë nëse do pushohen hetimet apo do duhet thellim i tyre.
Telashet e Metës
Teksa Berisha është akuzuar se ka gisht në skandalin me privatizimin e OSHEE, presidenti Meta akuzohet se ka gisht në skandalin CEZ-DIA. Administratori i DIA, Kastriot Ismailaj është dënuar me burg, por ndaj tij ka nisur një hetim i dytë. Prokuroria e Tiranës e hetoi atë për falsifikim dokumentesh, por vendosi të pushojë hetimet. Mirëpo Gjykata e Tiranës kërkoi që të nisë një hetim më i thellë për këtë akuzë. Mirëpo rinisja e një hetimi, në një kohë kur SPAK po merr jetë duket se është kambanë alarmi për shumë të tjerë përveç Ismailajt. Interesant në vendimin e gjykatës është se kërkohet që të hetohen dhe persona të tjerë, të cilët kanë përfituar nga falsifikimi i dokumenteve. Kjo do të thotë se organi i akuzës duhet ta shtrijë hetimin dhe te zyrtarë të tjerë të përfshirë. Por një ndër emrat më të akuzuar në skandalin DIA, është presidenti Ilir Meta. Në kohën kur u arrit pakti, ai mbante postin e ministrit të Jashtëm në qeverinë e Berishës. Juristi Romeo Kara pretendonte se Meta është personi kryesor që ka përfituar në këtë mes. Por sa i rrezikuar është presidenti nga rihapja e kësaj dosje?
Në dënimin që iu dha me 11 vite burg, Ismailaj e mbylli gojën gjatë gjithë procesit dhe vetëm në seancën e fundit deklaroi se është gati të flasë dhe të dorëzojë 100 prova të reja për këtë skandal. Por gjykata e refuzoi duke mos pranuar asnjë dokument. Por me rihetimin, pritet që Ismailaj të hapë “Kutinë e Pandorës” dhe të tregojë 100 provat, që sipas tij, tregojnë se ai nuk ka pasur rol në këtë mes. Por nëse hapen këto dokumente, gjasat që të dalin emra pushtetarësh janë të mëdha. Ajo që ka dhënë sinjale se Kastriot Ismailaj mund të fundosë Metën, është bashkëshortja e tij, Vojsava Ismailaj.
Dëshmia e bashkëshortes
Pak kohë më parë, Vojsava Ismailaj dha një intervistë, ku foli pa dorashka për rolin e Metës. Sipas saj, Ismailaj është i pafajshëm dhe ka dokumente që tregojnë se ai ka qenë në shërbim të Metës. “Kastrioti për shkak të aktivitetit të tij të hershëm, jashtë Shqipërisë kishte lidhje dhe miq në të gjitha anët e botës. Ilir Meta, por edhe të tjerë janë përpjekur vazhdimisht t’i shfrytëzojnë këto lidhje për të nxjerrë përfitime. P.sh lidhja e Kastriotit me CEZ në Pragë, është krijuar falë lidhjeve të tij dhe jo ndikimit të politikanëve shqiptarë. Këta të fundit kanë qenë ata, Ilir Meta në mënyrë të veçantë, që kanë shfrytëzuar lidhjet e Kastriotit, për të krijuar ata më pas lidhje me persona të rëndësishëm të biznesit apo edhe të politikës. Kështu ka ndodhur edhe me rastin e CEZ-it”, ka deklaruar ajo. Më tej ajo ka treguar lidhjet mes Metës dhe Ismailajt. Vojsava është shprehur se ata kanë ngrënë shpesh darka e dreka familjare. “Kemi kaluar shumë dreka dhe darka së bashku: Ilir Meta i kishte forcuar lidhjet me Kastriotin që në kohën e krijimit të FRESH-it.
Kastrioti kishte ndërmjetësuar edhe pajtimin e Ilir Metës me Fatos Nanon dhe ky është një fakt i njohur publikisht. Për t’ju rikthyer historisë së CEZ-it, po sjell vetëm një shembull: ka qenë pikërisht Ilir Meta, që pasi kishte realizuar uljen e çmimit të energjisë, i kërkonte Kastriotit që t’u kërkonte çekëve që ta shpërblenin atë, pra Ilirin, me pretendimin se ai i kishte bërë të fitonin miliona euro”, ka thënë më tej ajo. Madje ajo ka treguar se ka prova për këtë. Mjafton që të sekuestrohen tabulatet telefonike dhe të shihen mesazhet që ka shkëmbyer Meta me Ismailajn. Pra, kemi dy dosje, të cilat rrezikojnë të fundosin si presidentin ashtu dhe ish-kryeministrin.
Kliti Topalli
