Ilir Meta duket se ka ndërruar kurs 180 gradë sa u takon raporteve me SHBA dhe ish-kryeministrin Sali Berisha.
Pasi sekretari Blinken e shpalli të padëshiruar ish-kreun e PD, i vetmi qëi doli në krah dhe sulmoi shumë fort SHBA, ishte Ilir Meta. Madje ai arriti deri aty sa i cilësoi të pacipë amerikanët. Mirëpo qëndrimet e SHBA duket se kanë shqetësuar presidentin.
Vendimi ndaj Berishës u shoqërua me dy akte të tjera: Lufta ndaj korrupsionit në Ballkan u fut si prioritet për SHBA dhe së dyti do ketë bllokim pasurish kush destabilizon Ballkanin. Që pas këtyre lëvizjeve, kemi një ndryshim në raportet e Metës dhe Berishës.
Presidenti duket sikur është distancuar nga ish-kryeministri. Ky i fundit është vetëm në betejën me SHBA. Meta që pas deklaratës së 22 majit, nuk ka folur kurrë më për shpalljen të padëshiruar të Berishës. Ky i fundit është përplasur disa herë me ambasadën amerikane. Kjo e fundit reagoi flakë për flakë mbi qëndrimet e tij në Kuvendin e PD.
Deri më tani askush nuk i ka dalë më në krah Berishës, përfshirë dhe Metën. Vërtet presidenti ka marrëdhënie të tensionuara me SHBA, por rreshtimi krah një personi “non grata” do i prishte më shumë punë dhe Meta ka nisur të ndryshojë sjellje. Amerikanët e kanë bërë të qartë se kush mbështet emrat e padëshiruar nuk ka punë me ta dhe Meta si duket po distancohet nga Berisha. Veprimet e presidentit flasin vetë.
Së pari mori pjesënë ceremoninë e Ambasadës së SHBA për Festën e Pavarësisë. Po ashtu i dërgoi një letër presidentit Biden. Ka ndërprerë sulmet e akuzat si ndaj ndërkombëtarëve ashtu dhe ndaj qeverisë.
Madje përmes këshilltarit të tij ai kërkoi një frymë të re institucionale dhe nisi afrimin me PS. Nga ana tjetër njerëz pranë Berishës kanë aluduar për një takim mes Metës e Erion Veliajt. Pra duket se kemi një president ndryshe dhe Berisha ka mbetur i vetëm në betejën me amerikanët.
Meta axhendë më vete, Kryemadhi zhduket nga qarkullimi
Po nëse shohim me kujdes, Berisha është fokusuar i gjithi te lufta me SHBA, ndërkohë presidenti ka një axhendë krejt ndryshe. Merret me dekorata, reagime sa u takon problemeve sociale, etj., por ka qëndruar larg debatit për shpalljen e Berishës së padëshiruar. Madje edhe intervistat i ka shmangur duke treguar qartë se kemi një distancim.
Nuk duhet harruar se në maj Meta i cilësonte të pacipë amerikanët, por tashmë duket se e ka kuptuar se nuk u shpall dot luftë amerikanëve.
Por duket se humbja në zgjedhje dhe shpallja “non grata” e Berishës nga amerikanët është reflektuar edhe tek sjellja e kryetares së LSI, Monika Kryemadhi, e cila është zhdukur nga arena politike dhe mediatike.
Kjo pasi që pas zgjedhjeve të 25 prillit dhe pranimit të humbjes, duket se çdo ditë e më pak shohim gjurmë të kryetares së LSI-së, Monika Kryemadhit në jetën publike dhe politike të vendit. Edhe dje, që ishte data më e rëndësishme në kalendarin mysliman, festa e Kurban Bajramit, mungoi një urim nga kryetarja e LSI.
Me një njoftim për mediat, LSI bëri me dije se do të jetë Sekretari i Përgjithshëm i LSI, Endrit Braimllari ai që do të jetë në Komunitetin Mysliman dhe Kryegjyshatën Botërore të Bektashinjve për të uruar festën e Kurban Bajramit, duke “i zënë vendin” Kryemadhit në këtë detyrë.
Po ashtu Kryemadhi nuk ka postuar asnjë urim as në rrjetet sociale, ndryshe nga liderët e tjerë të politikës në vend, ndërsa bëhet me dije se ajo ndodhet me pushime. Pra, veprimet e Kryemadhit kohët e fundit krijojnë jo pak konfuzion, ndërsa kujtojmë se ajo habiti jo pak kur u shfaq krejt papritur krah bashkëshortit të saj, presidentit Ilir Meta në vizitën e tij në Budapest në ceremoninë e vendosjes së përmendores së Heroit tonë Kombëtar, Gjergj Kastrioti Skënderbeu. Në pamjet e publikuara nga Meta, Kryemadhi u shfaq e ulur krah bashkëshortit të saj kryetar shteti, sipas një protokolli ku në raste të tilla ulet vetëm “Zonja e Parë”.
