Presidenti Ilir Meta nuk ka dhënë asnjë argument ligjor, se përse nuk e dekretoi kandidaturën e Sandër Lleshit, për ministër të Brendshëm.
Të shtunën ai thjesht deklaroi, se nuk plotësoheshin “bindjet” e tij, se zoti Lleshi duhej emëruar ministër.
Sot ndërkohë, ka pasur një tjetër reagim nga Presidenca.
Nw një prej pasazheve të njoftimit, bëhet e qartë që Ilir Meta nuk ka asnjë argument ligjor, se pse nuk e dekretoi Sandër Lleshin.
Ai ka veçse argumentë politikë.
“Presidenti Meta ka bindjen e plotë se koha e drejtimit të shtetit shqiptar me Sekretar të Parë ka përfunduar njëherë e përgjithmonë”, thuhet në njoftimin e Metës.
Pra, sipas këtij pasazhi, bëhet e qartë që Ilir Meta i ka hyrë një beteje politike kundër mazhorancës.
Vetëm se këtë betejë, ai nuk po e bën nga selia e LSI-së, por nga ajo e Presidencës, duke shkelur kështu ligjin.
Në një tjetër pasazh, Ilir Meta lë të kuptohet se është ndjerë i sfiduar nga Sandër Lleshi.
“Presidenti i Republikës bën të qartë se nuk do të lejojë asnjë përpjekje sfiduese ndaj autoritetit te institucionit qe përfaqëson si Kryetar i Shtetit, Komandant i Përgjithshëm i Forcave te Armatosura dhe Kryetar i Këshillit të Sigurisë Kombëtare”, thuhet në reagim.
Meta nuk e bën me dije se për çfarë sfide flitet, por siç ka raportuar TemA, ai i kishte kërkuar Lleshit një takim sekret, gjë që nuk është pranuar nga ky i fundit.
Dhe me sa duket, nga Meta është parë si një sfidë e hapur që i është bërë atij, nga ana e Sandër Lleshit.
Tashmë bëhet e qartë që të gjitha arsyet e Metës, janë politike, dhe nuk bëhet fjalë për asnjë kriter ligjor, që nuk plotësohej nga Sandër Lleshi.
Veçse Meta këtë radhë ka gabuar postin, për të bërë politikë.
Presidenti nuk bën politikë.
Në rast se donte t’i shpallë luftë politike Ramës, selinë e LSI-së vetëm qindra metra më poshtë e ka.
Mund të japë dorëheqjen dhe të bashkohet edhe një herë tjetër me Berishën e Bashën.
Por publikisht dhe zyrtarisht, jo duke përdorur Presidencën për të “hedhur gurin e për të fshehur dorën”./TemA
