Presidenti Ilir Meta u është rikthyer përplasjeve me qeverinë pas një periudhe qetësie dhe mesazheve për paqe me mazhorancën.
Kreu i shtetit ka kthyer për shqyrtim në Kuvend ligjin nr. 79/2020 “Për të huajt”, i cili rregullon regjimin e hyrjes, të qëndrimit, të punësimit dhe të daljes së të huajve në/nga Republika e Shqipërisë. Subjekt i këtij ligji janë të huajt, të cilët hyjnë ose synojnë të hyjnë në vendin tonë me qëllim qëndrimin, kalimin transit, punësimin, studimin, si dhe daljen e tyre nga Shqipëria.
Teksa ka bërë të ditura arsyet e kthimit të ligjit, presidenti u shpreh se Shqipëria nuk i ka mundësitë të garantojë punësim e mirëqenie për njerëzit e saj kështu që nuk mund t’i garantojë dot as për të huajt. Ai tha se masa të tilla duhen marrë vetëm pas një analize të detajuar të pasojave të këtij vendimi. Kreu i shtetit nuk nguroi as të sulmonte qeverinë duke e bërë shkaktare për largimin masiv të qytetarëve.
Sipas tij, ligji për shtetësinë është një përpjekje e qeverisë për të plotësuar boshllëqet që ka lënë largimi i shtetasve shqiptarë. “Fluksi i shtetasve nga vendet e treta është përtej mundësive dhe kapaciteteve që Shqipëria ka, mund të ofrojë dhe mund të përballojë. Nëse Shqipëria nuk po ofron mundësi punësimi, mirëqenie, stabilitet, siguri dhe garanci për shtetasit e saj, si do të mundet të ofrojë mundësi për të huajt në një masë të gjerë?
Masa pranimi mund të ndërmerren vetëm pasi të analizohen pasojat e një politike të tillë. Qeveria po përmbush vetëm një qëllim parësor dhe afatshkurtër, plotësimin e boshllëqeve që po krijon largimi masiv i shqiptarëve”, tha presidenti.
Meta akuza Ramës për shpopullimin e vendit
Po ashtu presidenti akuzoi kryeministrin Edi Rama si përgjegjësin kryesor për shpopullimin e vendit. Ai tha se qeveria nuk di se si i përgjigjet këtij fenomeni duke mos patur asnjë strategji dhe asnjë masë. Sipas tij, kryeministri nuk është i shqetësuar aspak për këtë gjendje.
“Largimi i forcave të reja është një plagë e madhe për vendin, që duhet ndalur. Mbyllja e perspektivës për të rinjtë është rrënja e shpopullimit të Shqipërisë. Adresimi i menjëhershëm i këtij fenomeni është emergjencë. Shpopullimi, shqiptarët kanë humbur besimin se kushtet dhe cilësia e jetesës së tyre, mund të përmirësohen, dhe për këtë shkak ata largohen pasivisht.
Shumica qeverisëse nuk ka një strategji shtetërore se si do të duhet t`i përgjigjet me masa konkrete, këtij fenomeni të rrezikshëm. Jo vetëm kaq, por vetë Kryeministri në daljet e tij publike ka evidentuar qartë se nuk ka asnjë plan për të frenuar shpopullimin e vendit, por përmes deklaratave të tij ka evidentuar se trendi i ikjeve të shqiptarëve do të vazhdojë të jetë i lartë duke konfirmuar se qeveria shqiptare nuk është e shqetësuar lidhur me këtë gjendje”, u shpreh presidenti. /Nga Aleksandra Hoxhaj
