Presidenti Ilir Meta ka kaluar në heshtje ligjin që forcon Prokurorinë e Posaçme. Bëhet fjalë për ligjin “Për marrëdhëniet juridiksionale me autoritetet e huaja në çështjet penale”, i Ndryshuar, i cili u rishikua nga Parlamenti duke sjellë mjaft risi.
Me ndryshimet e bëra SPAK bëhet më e pavarur në raportet me ndërkombëtarët. SPAK bëhet pjesë e procesit të ekstradimeve, po ashtu mund të nisë vetë letërporosi dhe të ngrejë grupe hetimore me të huajt. Po ashtu më shumë pavarësi do të ketë edhe kur një individ shpallet i pavarur.
“Prokurori pranë prokurorisë me juridiksion të përgjithshëm nëpërmjet Prokurorit të Përgjithshëm ose prokurori pranë Prokurorisë së Posaçme kundër Korrupsionit dhe Krimit të Organizuar nëpërmjet drejtuesit të Prokurorisë së Posaçme, ia dërgon menjëherë urdhrin e kërkimit ndërkombëtar Zyrës Qendrore Kombëtare të Interpolit, e cila kryen menjëherë përkthimin në gjuhën angleze ose në një nga gjuhët e tjera zyrtare të Interpolit”, thuhet në ligj.
Asistenca e huaj
Përveç ndryshimit të procedurave mbi letër-porositë, aty është futur një nen, i cili mundon marrjen e asistencës nga agjenci të huaja ligjzbatuese. “Pas pikës 1 shtohet pika 1/1, me këtë përmbajtje: ‘1/1. Prokurori kompetent i rrethit ose, kur është rasti, prokurori i Prokurorisë së Posaçme, kur nuk kërkohet disponimi i gjykatës sipas parashikimeve të Kodit të Procedurës Penale ose marrëveshjeve ndërkombëtare të ratifikuara, kryen menjëherë ekzekutimin e kërkesave për ndihmë juridike’”, thuhet në ligj.
Ndërsa në relacionin që shoqëron draftin jepen detaje interesante. Është folur shumë se SPAK do të jetë në duart e ndërkombëtarëve, por tashmë krijohet mundësia që në çështje të caktuar mund të kërkohet asistencë nga prokurori të vendeve partnere. Pra nuk do ketë asnjë pengesë që aty të atashohen përfaqësues të SHBA apo vendeve të tjera. Momentalisht një gjë e tillë ka shumë procedura, pasi më parë duhet të kalojë nga Ministria e Drejtësisë, tani procedurat janë thjeshtuar.
Grupet hetimore
MONEYVAL është organizata kryesore sa i takon luftës kundër pastrimit të parave. Në relacion thuhet se dhe falë kërkesave të saj, janë thjeshtuar procedurat për të ngritur grupe të përbashkëta hetimore mes SPAK, prokurorive të thjeshta dhe shteteve partnere. Kjo do të thotë se do të jetë më e lehtë të gjurmohen paratë e pista të pushtetarëve.
Janë të shumtë ata që kanë llogari të fshehta dhe prona jashtë vendit. “Me propozim të prokurorit, drejtuesi i prokurorisë përkatëse nëpërmjet Prokurorit të Përgjithshëm ose drejtuesi i Prokurorisë së Posaçme mund të kërkojnë krijimin e skuadrave të përbashkëta hetimore në rastet kur: a) hetimet për një vepër penale kërkojnë kryerjen e veprimeve veçanërisht komplekse ose të vështira dhe që kanë lidhje edhe me një shtet tjetër; ose b) një ose disa shtete të tjera janë duke kryer hetime për vepra penale për të cilat rrethanat e çështjes kërkojnë kryerjen e veprimeve hetimore të bashkërenduara ose të përbashkëta në të gjitha vendet e tjera”, thuhet në ligj.
