Thellohet lufta mes presidentit Ilir Meta dhe kreut demokrat Lulzim Basha. Pasi ky iu fundit refuzoi kërkesat e Metës dhe Berishës për të çuar vendin drejt destabilizimit, Meta duket se ka ndërruar strategji. Në një intervistë televizive, Meta deklaroi se pas vendimit për negociatat do të nisë një aksion për t’i dhënë fund shtetit të propagandës dhe PPP. Ai tha se në nëntor do prezantojë nismën për mbrojtjen e Kushtetutës.
Me këtë lëvizje Meta duket se nis tentativat për të nxjerrë jashtë loje Bashën, duke synuar në këtë mënyrë që të bëjë dhe rolin e presidentit dhe rolin e kreut të opozitës. “Për mua data tjetër përveç 18 tetorit është 22 nëntori, dita kur shqiptarët në vitin 1998 me referendum miratuan Kushtetutën, e cila natyrisht është sakatuar padrejtësisht që nga viti 2008 e në vazhdimësi. Por, sidoqoftë në atë Kushtetutë të gjithë shqiptarët kanë votuar me shpresën dhe besimin se ajo do të mbrojë dhe garantojë të drejtat themelore të tyre. Ndaj unë më 22 nëntor do të bëj publike nismën time në mbrojtje të Kushtetutës, në mbrojtje të të drejtave themelore të qytetarëve shqiptar dhe kjo do të jetë një nismë mjaft e mirëmenduar dhe e mirorganizuar në mënyrë që të mos tolerojmë më në këtë vend, shkeljen dhe dhunimin sistematik të të drejtave kushtetuese të qytetarëve tanë”, tha Meta. Më tej ai e deklaroi hapur se bëhet fjalë për një aksion që do ndërmerret nga ana e tij kundër qeverisë. “Por pas 18 tetorit fokusi do të jetë 22 nëntori dhe ky do të jetë një aksion i vazhdueshëm që, nuk ka lidhje me partitë dhe forcat politike. Por që do të përfshijë gjithë ato personalitete të së drejtës, të të drejtave të njeriut që besojnë në demokraci, në rëndësinë e jashtëzakonshme, që ka respektimi i të drejtave të njeriut në këtë vend, të institucioneve të pavarura dhe që nuk konformohen dhe nuk pranojnë këtë situatë mjaft kritike në të cilën ndodhen sot të drejtat e njeriut në vendin tonë”, vijoi Meta. Pra kjo tregon qartë se tani opozita do rivalizohet nga presidenti, i cili i trembet shkarkimit.
Teksa Meta duket se e ka harruar që është president dhe ka vendosur të luftojë ndaj qeverisë, mazhoranca po punon për ta shkarkuar. Sot PS pritet të shtyjë afatet e komisionit hetimor për shkarkimin e Presidentit Ilir Meta nga detyra. Në datën 8 korrik Kuvendi i Shqipërisë votoi me 101 vota pro ngritjen e komisionit hetimor, i cili po heton shkeljet kushtetuese të Presidentit Meta. Afati i komisionit ishte 3 muaj dhe sipas përllogaritjeve përfundon misionin në datën 8 tetor. Por gazeta ka mësuar se mazhoranca ka ndryshuar strategji dhe se komisioni i posaçëm hetimor për shkarkimin e Metës pritet të vendosë sot për t’i propozuar seancës parlamentare shtyrjen e afatit. Por gazeta kontaktoi disa nga anëtarët e komisionit, të cilët theksuan se kërkesa vjen edhe nga fakti se konkluzionet e Komisionit të Venecias do të dalin më 12 tetor, një ditë pas mbledhjes dhe disa ditë pas mbylljes së afatit ligjor të strukturës hetimore që është data 8 tetor. Ndërkohë, të njëjtat burime theksuan se shtyrja e afatit do të kërkohet të jetë e shkurtër, që mund të shkojë jo më shumë se dy javë dhe kjo lidhet me faktin që komisioni të njihet me raportin e Venecias. Gjithsesi, kjo pritet të vendoset në mbledhjen e sotme të komisionit. Po ashtu, mësohet se Partia Socialiste do të dërgojë një delegacion, i cili do të jetë i pranishëm në datën 11 tetor në mbledhjen e Komisionit tëVenecias, kohë kjo kur do t’u jepet përgjigje teknike 8 pyetjeve të ngritura nga komisioni hetimor për Metën. Në mbledhjen e sotshme pritet që të jepen detaje dhe mbi provat që janë depozituar në komision nga institucione të ndryshe, për të faktuar shkeljet e Metës dhe pasojat që solli dekreti. Nga ana tjetër, disa nga anëtarët socialistë të komisionit hetimor pohuan për gazetën se mazhoranca është e vendosur për të shkarkuar Presidentin Ilir Meta nga detyra, duke theksuar se ky vendim pritet të merret brenda muajit tetor. /Rigels Seliman
