Ilir Meta ka shtuar sulmet dhe kërcënimet ndaj SPAK-ut. Në një konferencë për mediat, zoti Meta shprehur dje bindjen se drejtësia është e kapur nga kryeministri Edi Rama, ndërsa iu bëri thirrje qytetarëve që të bashkohen në nismat opozitare që t’i kthejnë vendit rendin kushtetues.
“Nuk është faji im që nuk besoj, i kemi dhënë shumë besim drejtësisë kur kemi parë që është kapur me fyt nga Rama. Zgjedhja e kryeprokuroret. Jemi përpjekur t’i japim kurajo që të dalë nga kthetrat e Tiranës, i kemi dhënë fakte, denoncime, prova konkrete, nuk është faji jonë nëse ajo vazhdon të qëndrojë në kthetrat e Ramës. Drejtësia është monopol i popullit të Shqipërisë. Shpresoj të mos Shkojmë në një kurs të përplaset populli me drejtësinë.
Drejtësia do përplaset me këtë dhunues të ligjeve që shkel hapur ligjet shpërdoron detyrën, barazinë në tendera. Drejtësi ka patur dhe ka në çdo kohë. Drejtësia që do vijë do e lartësojë këtë vend. Kush dëshiron të bëhet pjesë e drejtësisë që vjen është i mirëpritur dhe i nxitur të bëjë punën e tij”, deklaroi ai. Më tej Meta u bëri thirrje zyrtarëve që të bëjnë publike skandalet dhe të bashkëpunojnë për të denoncuar çdo vjedhje.
“Në ditët e ardhshme do të shihni skandale akoma më të rënda. U kam bërë thirrje të gjithë zyrtarëve, të jenë të kujdesshëm, të mos bëhen bedela. Ora e llogaridhënies ka afruar shumë. Përpëlitjet e fundit të kësaj klike antishqiptare vetëm se shtojnë vullnetin dhe rrisin përgjegjësin e shqiptarëve për t’i dhënë fund një herë e mirë asaj që po bëhet në vend. Kushtetuta shqiptare konsiderohet si letra më pa vlerë.
I ftoj të gjithë zyrtarët e ndershëm të vazhdojnë bashkëpunimin dhe të denoncojnë çdo vjedhje, është në nderin e tyre të jenë në anën e duhur të historisë. Le ta lëmë këtë aventurier në rrugën e tij. Shqipëria do të marrë drejtimin e duhur që do ta bëjë zonjë”, u shpreh ai.
Ndërkohë kryetari i Partisë së Lirisë, Ilir Meta është shprehur se është ndjerë gjithmonë krenar për gjeneralitetet që ka. “Të jeni shumë të qartë që unë kam qenë, jam dhe do të jem, Ilir Rexhep Metaj. Nuk kam asnjë arsye që të mos jem krenar për emrin e mbiemrin tim. Edhe fëmijët e mi kanë shumë arsye për të qenë krenarë për babain e tyre”, nënvizoi Meta.
