Rikthehen përplasjet mes mazhorancës dhe Presidencës. Ditët e fundit u vu re një ndryshim në retorikën e presidentit, por duket se ujërat nuk janë qetësuar mes tij dhe kryeministrit Edi Rama. Dje kreu i shtetit, Ilir Meta priti në një takim delegacionin e nivelit të lartë të Kongresit të Autoriteteve Lokale dhe Rajonale të Këshillit të Europës.
Por, dritë mbi këtë takim hodhi vetë presidenti i vendi. Përmes një postimi në rrjetet sociale ai ka sulmuar mazhorancën për 30 qershorin, duke deklaruar se u cenua demokracia me mbajtjen e zgjedhjeve. Ankesa e tij vjen jo rastësisht pasi KiE vendosi të mos i monitoronte zgjedhjet e 30 qershorit.
“Votimet një partiake të 30 qershorit nuk i dhanë zgjidhje krizës, por cenuan rëndë edhe demokracinë vendore, duke e zhytur më shumë vendin në rrugën e paligjshmërisë dhe kapjes së shtetit. Kushtet e Bundestagut, janë pasqyra më e qartë e problemeve serioze me të cilat përballet vendi, por edhe harta më e sigurt për rrugën europiane që duhet të ndjekë pa vonesë Shqipëria”, shkruan presidenti Ilir Meta. Gjithashtu, kreu i shtetit deklaroi se ka vlerësuar monitorimin e përkushtuar të situatës në vend nga Këshilli i Europës. “Një takim i frytshëm me delegacionin e nivelit të lartë të Kongresit të Autoriteteve Lokale dhe Rajonale të Këshillit të Europës. Vlerësova angazhimin e tyre për monitorimin serioz të situatës në Shqipëri, duke theksuar se vendi ndodhet në një krizë sui generis përfaqësimi, dhe në çekuilibër të plotë të mekanizmave të kontrollit dhe balancës”, shkruan Meta.
Reagimi i Ballës
Delegacioni i Këshillit të Europës dje u prit edhe nga kreu i Grupit të Përgjithshëm të PS, Taulant Balla. Pas takimit, Balla dha një deklaratë për mediat duke bërë me dije disa nga pikat kyçe që diskutoi me delegacionin e KiE, mes të cilave edhe mungesa e tre kryebashkiakëve, të cilët u prekën nga ligji i dekriminalizimit. Për këtë, Balla i kërkoi presidentit që pas përfundimit të situatës emergjente (31 mars 2020), të dekretojë datën e zgjedhjeve. “Pjesë e këtij diskutim ka qenë edhe fakti që Presidenti për tre bashki, për të cilat mandati i kryebashkiakëve ka mbaruar, Shkodër, Durrës e Vorë, bazuar dhe në parashikimet e Kushtetutës, të përcaktojë brenda kohës së mundshme, sa i përket Durrësit dhe Vorës, jemi në kushtet e emergjencës civile, dhe sapo emergjenca të ketë përfunduar, presidenti të ketë dekretuar datën për zgjedhje”, tha Taulant Balla.
Më tej kreu i grupit parlamentar të PS theksoi edhe njëherë se zgjedhjet në Shqipëri do të mbahen në 2021, ndërsa zgjedhjet vendore në 2023, duke i treguar opozitës së bashkuar se zgjedhje të parakohshme nuk do të ketë. “Venecia ka dhënë përgjigje shteruese lidhur me kushtetutshmërinë e 30 qershorit. 30 qershori është një datë kushtetuese, zgjedhjet janë po aq kushtetuese dhe të gjitha organet e dalë prej tyre janë ligjore dhe vijojnë punën e tyre për një mandat 4-vjeçar, që përfundon më 2023. Qytetarëve të Shkodrës, Durrësit e Vorës sa më shpejt të jetë e mundur t’iu japim të drejtën që përmes votës të kenë kryebashkiakun. Kryebashkiakja e Shkodrës është përtej mandatit 4-vjeçar”, tha ai. /Sot/ ORNELA ÇELPICA
