Premiera e filmit të restauruar “Gjeneral Gramafoni” bëri bashkë artistët mbrëmjen e së enjtes.
Me regji nga Viktor Gjika filmi prodhim i vitit 1978 iu nënshtrua më parë restaurimit dhe pas këtij procesi, Arkivi Qëndror Shtetëror i Filmit shfaqi për publikun premierën e filmit të restauruar “Gjeneral Gramafoni”.
Me regji nga Viktor Gjika, skenari i filmit është nga Vath Koreshi dhe muzikë nga Aleksandër Peçi. Regjisori Mevlan Shanaj ishte i pranishëm në premierën e filmit të restauruar dhe shprehet se “Gjeneral Gramafoni” është një ndër filmat më të njohur të ekranit shqiptar.
Regjisori Shanaj thotë se me këtë film regjisori Viktor Gjika i dha Shqipërisë personalitet në imazh. “Më 20 prill u promovua libri Ester Gjika, “Film, pas filmi, unë e bija e ….” Viktor Gjikës dhe njëkohësisht u shfaq “Gjeneral Gramafoni” i restauruar!
Një ndër filmat më të njohur të ekranit shqiptar, ku Bujar Lako erdhi si gjeneral dhe ashtu mbeti deri në fund!
Regjisori Viktor Gjika me këtë film konsolidoi jo vetëm veten si violina e parë e ekranit shqiptar, por i dha Shqipërisë personalitet në imazh”, shprehet regjisori Mevlan Shanaj për këtë film pas premierës. Premiera e filmit të restauruar “Gjeneral Gramafoni” u shfaq në kinemanë Cineplexx (TEG) mbrëmjen e datës 20.
Në filmin “Gjeneral Gramafoni” me regji nga Viktor Gjika aktorë në role janë Bujar Lako, Guljelm Radoja, Sheri Mita, Reshat Arbana, Sandër Prosi, Kadri Roshi, Margarita Xhepa, Tinka Kurti, Dhimitër Orgocka, Sulejman Pitarka, Muhamet Sheri, etj.
Në mesin e viteve ’30 fillon penetrimi dhe parapërgatitja e pushtimit Italian të vitit 1939. Halit Berati, një klarinetist virtuoz dhe Parandili ftohen nga një sipërmarrës italian të incizojnë në pllaka gramafoni, meloditë e tyre të cilat do të shiten së bashku me muzikën italiane të kohës së fashizmit. Gjatë kësaj kohe fillojnë grevat e punëtorëve të naftës ku Halil Berati është punëtor.
Puna me restaurimin e filmit
Falë bashkëpunimit mes Arkivit Qëndror Shtetëror të Filmit dhe Fondazione Gramsci di Puglia në kuadër të projektit “Për një rrjet institucionesh kulturore midis Pulias dhe Shqipërisë”, u krye në qendrën DABIMUS srl në Bari, restaurimi digjital i filmit “Gjeneral Gramafoni”.
AQSHF shprehej më parë se ishte një film kult i kinematografisë shqiptare me skenar nga Vath Koreshi dhe muzikë të stilizuar bukur nga mjeshtri Aleksandër Peçi, nën regjinë e të madhit Viktor Gjika, që vinte për publikun i restauruar mjeshtërisht në studion e qendrës DABIMUS srl nën drejtimin e profesorit Nicola Barbuti.
Arkivit Qendror Shtetëror të Filmit shprehet se filmi i restauruar “Gjeneral Gramafoni” mund të ndiqet edhe online për disa ditë. “Për kënaqësinë e të gjithëve filmi i restauruar “Gjeneral Gramafoni” mund të ndiqet online në 4K, për 1 javë, në kanalin YouTube të AQSHF-së dhe më pas do të jetë i disponueshëm për subjektet që përcjellin filmin në publik, sipas rregullave dhe procedurave të përcaktuara nga legjislacioni shqiptar në fuqi”, thuhet nga Arkivi Qëndror Shtetëror i Filmit. Viktor Gjika lindi më 23 qershor 1937 në Korçë dhe vdiq më 3 mars 2009 Tiranë. Ishte një nga regjisorët më të rëndësishëm dhe të shquar të filmit shqiptar. /Nga Julia Vrapi
