Pas takimeve me përfaqësues të të gjitha palëve politike në Shqipëri, zoti deputeti gjerman i SPD-së, Christian Petry tha se po ndërmerren përpjekje të mëdha për Reformën në Drejtësi dhe atë të shtetit ligjor. Ai shtoi se ka ende punë për luftën ndaj krimit të organizuar dhe trafiqeve.
Sipas tij, dorëzimi i mandateve parlamentare nga opozita nuk është hapi i duhur. Mdërkohë, ai personalisht do të shprehë një opinion pozitiv në Parlamentin gjerman për çeljen e negociatave të anëtarësimit me Shqipërinë.
“Fillimisht partitë e koalicioni CDU-CSU dhe SPD do të krijojnë një opinion të përbashkët lidhur me hapat e mëtejshëm që do të ndërmerren lidhur me mundësinë e çeljes së negociatave me Shqipërinë. Pastaj do ta rakordojmë këtë opinion me partitë e opozitës për t’ia paraqitur më pas Parlamentit. Një vendimmarrje, të cilën unë do ta shoqëroj në mënyrë pozitive”, tha deputeti i Bundestagut nga SPD-ja.
Zoti Petry tha për gazetarët se duhet gjetur një rrugë për të rikthyer normalitetin politik dhe promovon pjesëmarrjen në zgjedhjet e ardhshme lokale të të gjitha partive politike, veçanërisht të Partisë Demokratike. Ai shtoi edhe nuk sheh arsye për mospjesëmarrjen e opozitës në zgjedhje.
“Është vendim i lirë apo e drejtë e çdo partie politike, e çdo grupimi të caktuar për të marrë pjesë ose jo në zgjedhje. Nëse një proces zgjedhor zhvillohet pikërisht sipas kritereve që përcakton ligji për zgjedhjet, mendoj që nuk ka arsye përse dikush duhet të merrte vendimin për të mos marrë pjesë në to. Të gjitha shkeljet në proceset zgjedhore, të cilat janë bërë të ditura deri tani, ose janë publikuar nga ana e opozitës, për mendimin tim duhej të bëheshin edhe të vlefshme. Në këtë pikë, unë ende nuk shikoj se janë të tilla”, tha Christian Petry, deputet gjerman në Bundestag. /Top Channel
